Parlamentario Xiomara Maduro ta denuncia:
ORANJESTAD (AAN): E siman aki, Parlamentario Xiomara Maduro a bati alarma cu Parlamento no ta ricibiendo informacion financiero di Gobierno.
Minister Gerlien Croes a bisa cu nan lo ta transparente den gobernacion. Minister Geoffrey Wever a bisa cu tur retraso den cifranan di Gobierno di cada kwartaal, a pasa pa pasado.
Sinembargo kico nan ta constata cu te e siman aki, ainda no tin cifra di e ultimo kwartaal di 2025, e Uitvoeringsraportage URK4 2025 den cual Gobierno ta duna cuenta di finansa publico, no ta publica y tampoco entrega na Parlamento di Aruba. Consecuentemente e opinion di CAft riba e ultimo cifranan di aña 2025 tampoco ta conoci.
Ademas no tin conseho di CAft riba Presupuesto 2026 cu a keda aproba dia 23 di december 2025 caba pa Parlamento. Segun e Ley di LAft, esaki lo mester a wordo entrega ya dia 6 di januari. Sinembargo teniendo cuenta cu dianan di fiesta lo por tin un retraso, pero esaki nunca por yega y pasa un luna sin cu Parlamento ta wordo informa di e opinion di CAft riba Presupuesto 2026.
Tin algo cu no ta cuadra aki y lamentablemente Ministernan Geoffrey Wever y Gerlien Croes, y e propio CAft no ta bisa nada. Nan TUR tin Parlamento y Aruba den scuridad financiero.
