Parlamentario Xiomara Maduro:
ORANJESTAD (AAN): Dialuna Parlamento di Aruba a trata Cuenta Anual 2019 y a aproba esaki cu 17 voto pro y un voto contra. Ta importante pa sa cu den aña 2019 Gabinete Wever-Croes a logra cambia e maneho y e rumbo financiero di Aruba, y ta logra un di e miho resultado financiero prome cu e pandemia di Covid-19.
En corto den Cuenta Anual di 2019, e deficit financiero di Gobierno a mehora cu 120 miyon Florin. Entrada di Gobierno a subi cu 121 miyon Florin. Gasto di Gobierno a keda bou control. E debe di Aruba a stop di crece pa prome biaha despues di hopi tempo. Aruba a logra surplus primario grandi cu ta core den 200 miyon Florin.
Den 2019, Aruba no solamente a cumpli, pero a supera e norma financiero acorda cu Hulanda. Di e manera aki un cambio grandi a worde logra den e rumbo financiero di nos Pais, y ta laga atras un era cu tabata tipifica pa debe halto y deficit grandi.
Trabao den ekipo a logra pa Aruba: Como ex Minister di Finansa nos kier gradici di curason tur Aruba su profesionalnan cu a traha hopi duro pa logra e cambio aki den Aruba su finansa publico. Un pabien y danki grandi ta bay specialmente na e ekipo di Departamento di Finansa, Centrale Accountantsdienst, Departamento di Legislacion y Algemene Rekenkamer pa nan trabao diligente na bienestar di Aruba. Trabao den ekipo, semper ta logra pa Aruba. Danki pa kere den Aruba!
