Parlamentario Endy Croes sorprendi cu algun no ta ni compronde
ORANJESTAD (AAN): Parlamentario Endy Croes a splica cu Parlamentarionan di Coalicion AVP-Futuro cu excepcion di Mike de Meza te cu awor ta mal perdi den e reunion cu a continua diamars ultimo tratando e tema consensusrijkswet HOFA.
Unico defensa cu Parlamentarionan aki durante 10 ora largo durante e reunion publico a keda trece dilanti ta cu Evelyn Wever Croes a firma e Bestuurlijk Akkoord juni 2024 y cu e consensusrijkswet HOFA cu nan gobierno a entrega recien na Hulanda ta un concepto di ley y dia esaki regresa Parlamento di Aruba oficial lo trat’e y nan lo percura pa vota riba dje.
Hopi tristo: Tristo cu tin varios Parlamentario cu no ta compronde e proceso. Pesey e ta trece un Breaking News pa e parlamentarionan aki: Consensusrijkswet HOFA no ta bin back Parlamento di Aruba pa votacion. Laga nos splica poco di e proceso.
Ta trata di dos Ley esta 1) un Consensusrijkswet Houdbare Overheidsfinancien Aruba (HOFA) cual ta un ley di Reino y 2) Landsverordening Waarborging Houdbare Overheidsfinancien pues un ley local di Aruba. Pa locual ta e ley di Consenso di Reino e proceso ta diferente cu Landsverordening (ley nacional). Unabes cu gobierno di AVP-Futuro a aproba, firma y acepta e consensusrijkswet HOFA y a manda esaki Rijksministerraad (Hulanda) desde 13 di augustus 2025 pa un aprobacion final, e proceso a cuminsa cana su caminda oficial.
Asina cu Rijksministerraad a aproba esaki, cual a tuma lugar 29 di augustus 2025, Hulanda a habri e internetconsultatie cu nan ta haci cu tur ley cu Tweede Kamer mester vota riba dje (cual tambe a tuma lugar y a cera 28 di september 2025).
Tur esaki gobierno di AVP-Futuro a haci sin a informa of trata esaki den Parlamento, sin informa Gremio, Sindicato y pueblo di Aruba.
Despues nan ta mand’e door pa Raad van State (Hulanda) pa un conseho. E conseho di Raad van State (di Hulanda) ta yega back den man di gobierno di Hulanda y gobierno di Aruba tambe ta ricibi esaki. Cambionan ta worde haci a base di e conseho, Rijksministerraad ta tuma un decision final y ta manda e concepto di Ley di Reino pa Tweede Kamer (Hulanda) y Parlamento di Aruba pa por haci pregunta. Ora cu Gobierno di Hulanda y Aruba contesta e preguntanan, e concepto di ley di consenso di Reino, HOFA ta cla pa Tweede Kamer (Parlamento di Hulanda) vota riba dje y pa asina e drenta na vigor pa Aruba.
Den otro Palabra, Parlamanto di Aruba no ta trata, ni tampoco lo vota riba Rijkswet HOFA. Ta 150 Parlamentario Hulandes na Den Haag lo bay vota riba esaki y NO Parlamento di Aruba. Aruba por entrega un propuesta di un amienda pero na final ta Parlamentario Hulandes mester presenta esaki durante di e tratamento y ta 150 Hulandes lo vota riba esaki tambe.
Pues na TUR Parlamentarionan di Coalicion kendenan a gaña henter dia den sala di reunion cu lo vota na Aruba riba Rijkswet HOFA lo ta bon Mike Eman, Gerlien Croes y Geoffrey Wever mandanan un cursus urgente pa nan stop di papia kakalaka riba un tema asina serio! Stop di tuma boso mes y pueblo haci.
