ORANJESTAD (AAN): Durante su segundo discurso den Parlamento, parlamentario Xiomara Maduro a enfatisa cu tur hende ta di acuerdo cu Aruba mester inversion,
pero el a splica tambe cu ainda tin varios preocupacion riba e Ley di Inversion y Desaroyo.
Segun Maduro, e problema principal no ta placa pa inversion. E problema real ta cu gobierno no tin suficiente capacidad pa ehecuta e proyectonan.
Maduro a bisa cu den departamentonan di gobierno no tin suficiente personal pa prepara y dirigi proyectonan grandi. Tambe no tin suficiente companianan ni trahadonan pa traha riba varios proyecto na mesun momento.
Segun Maduro, Gobierno no a evalua suficientemente pakico inversionnan no ta wordo ehecuta y p’esey no a presenta e solucionnan pa esaki. E ley ta crea un fondo nobo pa mantene e placa pa inversion disponibel, pero e problemanan cu ta stroba inversion di wordo haci, ta keda sin wordo resolvi.
Maduro a expresa tambe e preocupacion cu, si no tin suficiente proyectonan prepara, e fondo por wordo uza pa proyectonan cu no ta realmente necesario of cu ta basa mas riba preferencia politico.
Pa e motibonan eynan, e parlamentario no ta haya hustifica pa e ley wordo aproba na e momento aki.
