ORANJESTAD (AAN): Mientras cu Prome Minister Mike Eman ta duna entrevista na television nacional na Hulanda pa presenta su ‘vision’ pa Aruba,
e ironia grandi ta cu na Aruba mes pueblo no ta ricibi e mesun claridad. Hulanda ta tende bon con Eman kier pinta futuro di Aruba, pero na Aruba mes tur hende ta keda den scuridad tocante e impacto real di decisionnan cu lo determina nos futuro economico y politico.
Rijkswet HOFA: Silencio di Eman vs Preocupacion di Pueblo - Un ehempel cla ta e discusion riba e Rijkswet HOFA, e ley cu ta trata supervision financiero di Aruba den un bachi legal nobo, cu ya a crea hopi preocupacion tocante autonomia di nos pais.
Diferente medio y analista a confirma cu e tema aki ta provoca tension y preocupacion serio den sociedad y den Parlamento. Sinembargo, unda e comunicacion serio di Eman ta pa splica pueblo kico ta pasando den gobernacion?
Parlamentario Maduro ta puntra, unda e conferencia di prensa amplio di Eman a keda pa splica pueblo na manera cla: kico exactamente HOFA ta nifica, ki poder Aruba lo perde of mantene, con e acuerdo lo afecta e cuidadano, y pakico Gobierno ta considera esaki ta asina necesario? “Liderato responsabel ta exigi dialogo directo cu pueblo, cu transparencia y respet. En bes di esey, e unico noticia cu Eman ta duna via television na Aruba ta, unda ta piki sushi den bario y ki dia tin fiesta di Ban Bek Caya. Un campaña permanente di imagen y nada importante tocante deuda, autonomia y gobernacion en general,” Parlamentario Maduro ta enfatisa.
Medio internacional y local ta raporta cu den Parlamento tin preocupacion cu e proceso rond di HOFA no tabata suficientemente democratico y tampoco transparente. Si parlamentarionan mes ta expresa falta di claridad, con por spera cu e pueblo lo sinti nan mes bon informa?
Aruba merece un gobierno cu no ta core pa pregunta dificil. Un gobierno cu no ta comunica solamente ora cu tin camara internacional presente. “Aruba mester di un Minister President cu ta papia cla cu su pueblo, den idioma cu pueblo ta compronde, y cu ta trata ciudadano manera adulto capas di compronde e realidad. Democracia no ta funciona cu mercadeo politico y campaña permanente so. Democracia ta funciona cu informacion, transparencia y responsabilidad. E minimo cu Eman por haci ta informa pueblo cu honestidad y claridad,” Parlamentario Maduro ta expresa.
