ORANJESTAD (AAN) -- E siman cu a pasa a trata den Parlamento e tema di “RAft” (Rijkswet Aruba finacieel toezicht) y Ricky Hoek di Fraccion di MEP, a reacciona tocante e tema den conferencia di prensa di fraccion di MEP.
Hoek a comenta cu Prome Minister Evelyn Wever-Croes tabata den Parlamento e momentonan di e debate, y a duna un splicacion tocante e estado di e debenan financiero cu gobierno di Aruba mester paga bek, entrante October 2023.
Esaki ta un tema hopi importante pa Aruba mirando cu e ta encera nos pais su economia, finanzas, y tambe e debenan cu mester bay paga den futuro. E debe que mester paga aworaki ta a base di e 916 miyon florin cu Aruba a haya como prestamo durante e temporada di Covid-19.
Den e temporada aki, manera tur hende sa, nos pais a pasa den un situacion sumamente dificil, un momento cu Aruba su economia a paraliza totalmente, y cu no tabata tin entrada “at all” pa ningun hende den nos pais. Tabata gobierno su disposicion y tur esfuerzo haci pa tanto empleadonan publico como di sector priva, haya entrada pa sobrevivi. Y pesey gobierno a tuma e decision di pidi un prestamo di 916 miyon florin.
E parlamentario a remarca cu awe a yega e momento cu mester pensa con gobierno ta bay paga bek. Hulanda den su caso, como e Instancia cu a duna e fianza financiero aki, a propone un COHO y un RAft, y manera ta conoci e COHO, aña pasa, a keda desbarata for di mesa, pasobra e proceso caminda a wordo haci y entrega na gobierno di Aruba, no tabata e miho manera, pasobra nan a bisa cu tin consenso pero na ningun forma, ni Aruba, ni Curacao, ni Sint Maarten, no tabata di acuerdo cu e manera con Hulanda a impone e COHO riba nan.
Ricky Hoek a haci enfasis riba e hecho cu Hulanda ainda no a contesta e serie di preguntanan cu Parlamento di Aruba a manda pa Tweede Kamer, tocante pakico nan kier impone un RAft pa Aruba na luga di otro forma cu ta cuadra cu Aruba su Constitucion. Den otro articulo por lesa mas tocante e posicion di Fraccion di MEP, den e caso aki den palabra di Parlamentario Hoek.
