ORANJESTAD (AAN): Mientras economia di Aruba ta sigui desaroya, Parlamentario Mike de Meza ta considera cu e parti pariba di nos isla ainda no ta haya e atencion necesario.
Particularmente e situacion di desperdicio na San Nicolas ta exigi atencion mas serio y structural, asina el a subraya durante un entrevista recien.
Segun Parlamentario De Meza, por observa cu ciudadanonan ta benta sushi y otro tipo di desperdicio den diferente sitio, entre otro den mondi, patras di cas y den areanan publico. El a indica cu esaki ta representa un reto grandi pa henter Aruba, pero tambe pa San Nicolas y e districtonan rond di dje.
Parlamentario De Meza a expresa su apoyo pa e concepto presenta pa Minister di Turismo, Wendrick Cecilia. Segun e propuesta, parti di e surplus financiero di Aruba Tourism Authority (ATA) lo wordo destina pa pone bakinan grandi pa desperdicio den diferente bario, caminda ciudadanonan por deposita nan sushi gratuitamente.
De Meza ta di opinion cu e iniciativa aki por contribui significativamente na mehoramento di limpiesa, especialmente den e parti pariba di brug.
“Turismo ta cuminsando haya mas presencia den e parti pariba di nos isla, aunke ainda tin hopi trabou pa haci pa atrae mas bishitante. Limpiesa ta un factor esencial pa haci e area mas atractivo. Ora turistanan yega Aruba y confronta un isla sushi, esaki por afecta nan impresion y e imagen di Aruba como destino turistico,” Parlamentario De Meza a expresa.
El a enfatisa cu un San Nicolas mas limpi no solamente ta importante pa bienestar di su habitantenan, sino tambe pa desaroyo economico y turistico di henter e parti pariba di Aruba.
