Segun Parlamentario Tevreden, fraccion MEP:
ORANJESTAD (AAN) – Den conferencia di prensa di fraccion di Partido MEP, Parlamentario Hendrik Tevreden a hiba palabra, y el a enfoca riba su colega parlamentario Miguel Mansur, di Accion 21.
Tevreden a referi na un carta publica pa Mansur y esaki ta su reaccion: “Ya mi a cuminza splica, di hopi tempo caba, cu e comportacion y observacion cu tin riba señor Mansur di Accion 21, for di momento cu el a drenta Parlamento por a mira su tipo di caracter y di amenaza pa Sociedad cu e persona aki ta”, el a bisa.
Segun Tevreden, Mansur a saca dos of tres persona di su partido, inmediatamente, pasobra nan a vocifera contra dje y su pensamentonan den e partido.
“Mi ta kere cu ta bon pa pueblo sa cu señor Mansur ta esun cu kier hiba nos pia y man mara na Hulanda, pa Hulanda tuma over y haci tur locual nan ta desea pa haci na Aruba”, Tevreden a expresa.
El a agrega cu Parlamentario Mansur ta un bende patria, pero mas cu esey awo, e ta un persona cu ta discrimina y tambe cu ta dictatorial den su forma di actua, cu kier persegui hendenan.
Segun Tevreden, den su articulo por wak cu Mansur kier persigui esnan cu ta Cristian of cu tin un creencia Cristian riba e pais aki; anto, e tin un problema pasobra segun estadistica, mas di 90% di e pueblo na Aruba, tin un creencia Cristian.
El a agrega cu den un pais democratico cada un di nos tin derecho di vocifera nan opinion y di bisa kico nan ta pensa y kere, y con nan kier mira e pais aki. “Tur manifestador cu ta actua segun reglanan di orden publico, tin derecho di manifesta, di trece un carta pa gobierno, pa bin na Parlamento. Pero contra e hendenan aki, cu kier manifesta y busca e forma di expresa nan mes, e kier manda un carta of un articulo, cu ta discrimina nan, y tambe persigui nan” e parlamentario a subraya.
Y mas ainda, Tevreden ta bisa, Mansur kier sa si nan ta contribui na e pais aki, y tocante esaki, el a expresa: “Ta bon pa informa su mes, en caso cu e no tabata sa, cu e Cristiannan Catolico ta esnan cu a establece scolnan y centronan di cuido den e pais aki. Den e filosofia Cristian a percura pa awe, nos tin ayudo social na Aruba; y awo, bo tin e tendencia di puntra cu kico esnan Cristian a contribui cu e pais aki?” Parlamentario Tevreden a señala.
