ORANJESTAD (AAN) – Lider di Fraccion di AVP den Parlamento, Jennifer Arends-Reyes, a presenta dos mocion fundamental durante e reunion publico reciente pa trata presupuesto supletorio 2025.
Nan ta dirigi na dos prioridad: siguridad na nos playanan y regulacion husto di vacation rentals.
Segun Arends-Reyes, Aruba ta un destinacion turistico cu ta depende principalmente di su playa y lama como atraccion principal. Sinembargo, den añanan reciente tanto bishitante como ciudadano local a perde nan bida den accidente na lama, un situacion cu ta crea gran preocupacion.
“Cada bida ta balioso, y nos no por sigui warda. Siguridad preventivo ta un prioridad pa un destinacion cu ta bende su playa como atraccion principal,” segun Arends-Reyes.
E mocion ta urgi gobierno pa hunto cu AHATA, ATA y otro stakeholders relevante implementa un sistema integral di lifeguards califica y entrena na tur playa popular di Aruba. Den e mocion, e fraccion ta pidi pa den un periodo di maximo 3 luna, presenta un rapport y plan concreto na Parlamento, y cu su implementacion ta cuminsa den prome lunanan di 2026.
Arends-Reyes a splica cu e mocion aki ta busca proteha tur bida, sin distincion si ta turista of local, y cu siguridad ta un condicion esencial pa mantene siguridad y reputacion di Aruba como destinacion turistico.
E segundo mocion cu Arends-Reyes a presenta ta dirigi na e crecemento di e asina yama Airbnb na Aruba. Segun e lider di fraccion, esaki ta un sector cu ta sigui crece pero cu falta regulacion, loke ta crea competencia desleal cu hotel y resortnan, y ta pone presion riba nos infrastructura y comunidad.
“Nos no ta contra innovacion of hospedahe alternativo, pero mester tin regla claro. Si hotel y resortnan ta cumpli cu registro, impuesto y normanan di siguridad, nos no por laga vacation rentals keda sin control. Esaki ta un cuestion di igualdad y di proteha nos economia,” segun Arends-Reyes.
E mocion ta solicita gobierno pa traha y presenta un cuadro legal y operacional pa regulacion di vacation rentals, basa riba:
- Registro oficial pa tur persona y/of compania cu ta huur cas cu turista.
- Recoleccion husto di impuesto pa evita perdida financiero pa nos pais.
- Cumplimento cu normanan di siguridad y calidad, pa garantisa un estadia safe pa bishitante y pa proteha comunidad local.
- Competencia husto den sector turistico pa evita cu operador informal ta haya beneficio sin contribucion igual.
Segun Arends-Reyes, Aruba lo beneficia di un regulacion cu ta sigura cu huur di vacation rentals ta contribui di forma igual na nos economia, ta proteha e interesnan di residente y ta garantisa un ambiente competitivo husto pa hotel y resortnan.
E dos mocionnan ta mustra claridad den direccion cu Fraccion di AVP ke duna: un Aruba mas safe pa su residente y bishitante, y un economia mas husto y sostenibel den sector di turismo.
“Turismo ta e pilar principal di nos economia. Si nos kier sigui prospera, nos mester proteha bida y crea un sistema di competencia husto. Esaki ta loke nos mocionnan ta busca,” Arends-Reyes a conclui.
