Constantemente trahadornan di Horeca ta kehando
ORANJESTAD (AAN): Parlamentario pa fraccion di AVP, Sr. ing. Carlos Bermudez ta expresa su reaccion critico y firme despues di e reaccion di e representante di AHATA, señora LaSorte. E pregunta y sugerencianan cu e parlamentario a dirigi na e minister responsabel pa labor y turismo no a cay for di laira, pero ta basa riba señalnan concreto y repetitivo di trahadonan den e sector turistico.
No ta trata aki di un of algun caso isola. Al contrario, no ta un, ni dos, pero decenas di trahado den e industria di hotel a acerca Bermudez di un of otro forma pa comparti nan preocupacion tocante nan condicionnan di trabao y den algun caso hasta maltrato mental di parti di e dunado di trabao.
Pa motibo di miedo pa represaya of hasta perde nan trabao, e trahadonan aki no a of ta tribi pa acudi na Departamento di Labor pa hiba e asunto na un nivel mas halto den nan espacio di trabao. Precisamente pa motibo aki, Parlamentario Bermudez a dicidi pa proteha nan anonimidad ni menciona ningun hotel specifico den publico.
Bermudez ta aclaria cu, como representante di pueblo, ta su deber y obligacion moral pa tuma e señalnan aki na serio. Pa e motibo ey el a dirigi un carta oficial na Minister Cicilia pidiendo investigacion y presentando algun sugerencianan concreto pa mehora control y proteccion di trahadonan den sector turistico/hotelero.
Pa su sorpresa, e reaccion di e representante di AHATA ta mustra mas un condena di su accionnan cu un reconocemento di e problema. Bermudez ta enfatisa cu nunca tabata of ta su intencion pa punta dede na henter e industria di turismo/hotelero. Al contrario, e ta reconoce cu tin hotelnan cu ta trata na empleadonan corectamente y cu ta respeta nan derechonan como trahado. E hotelnan aki no tin nada pa teme di un investigacion. Mas aleu, un investigacion transparente por fortalece nan reputacion.
E pregunta cu ta keda ta: Di con e reaccion defensivo aki di parti di representante di AHATA? Si dunado di trabao (hotelnan) ta cumpli cabalmente cu nos leynan laboral, no tin ningun motibo pa preocupacion. Solamente esnan cu posiblemente no ta cumpliendo cu nan obligacionnan como,un bon doño di trabao lo tin motibo pa sinti preocupa.
Parlamentario Bermudez ta reconoce e derecho di AHATA pa defende interes di e sector hotelero, pero e ta subraya cu esaki no mester nifica minimalisa preocupacionnan legitimo di trahadonan, ni critica un parlamentario pa cumpli cu su deber pa tuma na serio y tuma pasonan pa salvaguardia esnan cu ta acerca su persona cu nan preocupacionnan.
Tambe Bermudez ta mustra cu e ta haya curioso y un tiki ironico cu e propio representante di AHATA tambe a dirigi un carta na e minister pa pidi pa un investigacion. Esaki ta confirma exactamente e punto cu su persona a haci for di principio: Transparencia y control ta necesario y ta den interes di e empleadonan como tambe e sector hotelero.
