Pregunta relaciona cu contrato di lease di helicopter:
ORANJESTAD(AAN): Recientemente DIARIO a entrevista parlamentario Aquanette Gun di partido MAS, kende a duna di conoce cu presidente di Parlamento Edgard Vrolijk no a bisa e berdad ora cu el a declara cu e parlamentarionan a haya 1 ora y mey pa revisa e 33 documentonan cu minister Rocco Tjon a bin cune despues di pidi pa un asina yama ‘besloten bijeenkomst’ riba 18 di September.
Segun Gun, e berdad ta cu e 14 parlamentarionan presente a haya apenas 40 pa 45 minuut pa pasa den e documentonan.
“E parti cu di berdad a sorprendemi ta cu di parti di coalicion tabata tin 3 parlamentario so cu a mira un balor agrega pa revisa e documentonan”.
Quizas nan tabata dispone di e documentonan aki caba, of quizas locual cu minister Tjon a declara na inicio tabata mas cu suficiente, cu nan no a mira un balor agrega pa nan por bay profundiza den esaki, segun e parlamentario di MAS.
El a sigui bisa cu pa revisa e documentonan na un manera adecuado, esaki ta rekeri di tempo y esey ta locual e parlamentarionan no a haya.
Pesey Gunn a duna di conoce cu di parti di MAS a indica cu lo manda un carta na minister Tjon pa asina e por comparti e 33 documentonan, pa nan por haya suficiente tempo pa studia nan.
Gunn a sigui bisa tambe cu un pregunta cu el a haci na e mandatario no a wordo contesta y cu Tjon a pidie pa manda e pregunta aki pe por escrito.
“E pregunta tabata tin mas tanto di haber cu e contrato di lease di e helicopter, caminda cu for di 2020 pais Aruba tabata tin mester di paga un suma pa aña, basa riba 40 ora mensual di vuelo”.
Bo ta wak cu despues e suma cu Aruba mester a paga a aumenta, mientras cu e cantidad di vuelo a bira menos, segun Gunn.
El a splica cu su pregunta na e minister tabata, cuanto pais Aruba a paga di berdad, desde cu a cera e contrato cu e compania te dia di awe.
Gunn a manda e carta pa Tjon y el a bisa cu e ta spera cu e por haya un contesta mas pronto posibel.
