ORANJESTAD (AAN): Den prensa recien por lesa cu Marisol Lopez-Tromp a bisa lo siguiente:
“E situacion cu POR a culmina despues di como Minister Marisol a expone casonan di corupcion cu el a topa cune. Y en bes cu a sostene Marisol su coleganan Minister, incluso Prome Minister y Parlamento, a actua contra ley pa core cu Marisol. Un di e motibonan pakico tin deterioro den e pais aki ta pa motibo di corupcion den aparato publico. Y ta esey Marisol a purba drecha. Pa e motibo ey a baha Marisol, den un procedura contra ley, cu sosten di fraccionnan den Parlamento, sosteni pa tur Minister cu awor ta demisionario.” Te aki e declaracion di Marisol Lopez-Tromp como lider di MAS.
Awor Marisol ta bisa cu el a worde baha contra ley? Ki tristeza!
Segun Endy Croes, cu e ponencia segun Marisol cu coleganan Minister, incluso Prome Minister y Parlamento a actua contra ley pa core cu Marisol y cu a baha Marisol den un procedura contra ley cu sosten di fraccionnan den Parlamento, sosteni pa tur Minister cu awor ta demisionario.
Atrobe Parlamentario Croes ta tuma nota cu Marisol NO ta papia berdad. E procedura den Parlamento encuanto e mocion di desconfianza cu a worde sostene door di e fraccionnan di e coalicion, di cual Marisol tabata forma parti no a yega na e bahamento di Marisol como Minister pa rasonnan conosi y discusionnan cu ya a debati riba dije aunke su propio fraccion a vota contra dije y a lage cay. Pues Marisol NO a worde baha pa y den Parlamento.
E motibo berdadero cu a manda Marisol cas: E motibo berdadero cu a baha Marisol como Minister ta cu Marisol den un reunion di Conseho di Ministronan den cual e tabata presente Marisol a bay di acuerdo cu un decision di Conseho di Ministronan encuanto un solucion pa e problema di spearfishing, pero despues a nenga di ehecuta tal decision.
Legalmente Marisol como individual por keda sin ehecutá un decision cu a worde tuma door di Conseho di Ministronan, pero actuando asina tin como consecuencia cu e mester entrega su retiro como Minister, ya cu el a actua empugna cu un decision di Conseho di Ministronan. Comokiera cu Marisol no obstante su actuacion contra decision di Conseho di Ministronan a nenga tambe di entregá su retiro como Minister, Gobierno di Aruba a haye obliga di retir’e como tal mediante un decreto firma pa Gobernador.
E retiro aki a tuma lugar completamente di acuerdo cu ley y democracia basa riba costumbernan constitucional.
Marisol mester stop di hunga victima y acepta cu su retiro como Minister ta e mes a ocasion’e door di actua contra un decision di Conseho di Ministronan. Marisol mester sinja papia e berdad y stop di gaña.
Pa e por bira lider di MAS Marisol a gaña cu el a worde baha como Minister pasobra semper el a para contra actonan coruptivo, lubidando su fechorianan den entregamento terrenonan di Pais Aruba na e.o. su sponsor principal Maurice Neme q.e.p.d.. Promer cu e mentira aki cu semper el a para contra corupcion, Marisol a gaña cu e ex-Presidente di Parlamento a dal e un mokete den sala di Staten y awor e ta gaña atrobe cu Parlamento a bahele como Minister den un procedura contra ley.
Ta kende por tin confianza mas den e credibilidad di Marisol den su funcion di lider di partido MAS, su di cuater Partido. Ainda Marisol kier pretende cu e tres partidonan MEP, AVP y POR cu a corre cunele a actua incorrecto y cu ta e so tin razon ? Marisol no solamente ta un mentiroso patalogico y un persona egocentrico, pero tambe un persona cu un actuacion excelente cu el a sinja na Mascaruba.
