Fraccion di MEP:
ORANJESTAD (AAN): Nos turismo ta den crisis na momento cu e sentimentonan den nos comunidad ta negativo. Pesey Fraccion di MEP a tuma e iniciativa pa inicia e dialogo pa stabilisa e crisis aki. Siman pasa a tuma luga e prome reunion, riba peticion di fraccion di MEP, den e Comision Permanente di Turismo tocante e estado di turismo na Aruba. Parlamento a reuni cu Aruba Tourism Authority (ATA) pa papia tocante e crecemento continuo di cantidad di bishitante, e preocupacionnan rond di overtourism y e transicion necesario pa un modelo di “High Value, Low Impact”.
Durante e reunion, ATA a expresa su preocupacion tocante e volumen di turista cu ta sigui crece. ATA ta boga pa stabilisa e cantidad di bishitante, cu un espacio limita pa crecemento.
Na mes momento, a wordo treci dilanti cu no ta tur stakeholder den e sector turistico ta comparti e mesun vision. Tin stakeholder cu ainda ta dirigi riba un crecemento mas grandi di e cantidad di turista.
“Un isla dushi pa biba ta un isla dushi pa bishita”
E vision di ATA ta basa riba e principio cu “un isla dushi pa biba ta un isla dushi pa bishita.”
Esaki ta nifica cu Aruba mester busca un turismo cu ta atrae un bishitante di “high value”, cu ta agrega mas balor na nos economia, mientras cu e impacto riba nos comunidad, naturalesa y calidad di bida ta keda mas abou. ATA ta busca, entre otro, bishitante cu tin un entrada halto, y cu ta aprecia y respeta nos naturalesa y cultura. Pa MEP, e reunion a confirma un punto importante: ATA no por haci esaki su so.
Gobierno mester tuma e liderasgo
“Si diferente stakeholder tin diferente vision y tin stakeholder cu ta sigui busca mas y mas crecemento, e ora Gobierno mester tuma e rol di liderasgo,” segun lider di fraccion Evelyn Wever-Croes.
“Sin un direccion cla di Gobierno, e cantidad di turista por sigui crece, mientras cu nos comunidad ta sinti e presion y impacto cada bes mas. Esey no ta e direccion cu nos comunidad ta pidi.”
MEP ta señala cu e modelo di “High Value, Low Impact” no ta un idea nobo. E decision pa e cambio di modelo turistico a wordo tuma durante e periodo di Gobierno Wever-Croes, hustamente pa haci e sector mas sostenibel y pa busca un mihor balansa entre crecemento economico y calidad di bida.
Dialogo mester wordo amplia
Pa MEP, e dialogo den Parlamento mester continua y meter wordo amplia. Aparte di reuni cu ATA, AHATA Y ATSA, manera MEP a pidi originalmente, awor ta pidi pa den e siguiente fase, involucra tambe stakeholdernan di aviacion y transporte maritimo, hunto cu AAA N.V. y APA N.V.
Tur e partinan aki ta conecta cu otro y tin influencia directo riba e cantidad di bishitante cu por yega Aruba y e presion cu esaki ta pone riba nos isla.
“Como Parlamento nos mester ta mas activo den busca di solucion,” Wever-Croes ta declara. “Nos no kier solamente constata cu tin un problema. Nos kier, hunto cu e stakeholders, determina unda nos limite ta, cua decisionnan nos mester tuma y cua medida ta necesario pa mantene Aruba un dushi lugar pa biba y na mesun momento fuerte economicamente.”
MEP lo sigui traha pa amplia e dialogo y pa busca un solucion pa e desafio di turismo, cu “High Value, Low Impact” como punto di salida.
“Nos kier un Aruba cu ta dushi pa biba, y hustamente p’esey, un Aruba cu ta dushi pa bishita. Pero esaki ta pidi decision, liderasgo y cooperacion” lider di MEP Evelyn Wever-Croes a duna di conoce.
