Lider di Fraccion di MEP: Hendrik Tevreden:
ORANJESTAD (AAN): Lider nobo di Fraccion di MEP, Parlamentario Hendrik Tevreden a hiba palabra durante un conferencia di prensa unda el a referi na e tema di RAFT.
El a bisa cu esaki ta e ley originalmente di consenso cu ta nifica cu mester tin un consenso entre Aruba y Hulanda durante di esaki pa e por continua.
Tevreden a indica cu di Parlamento a bin un mocion, ademas cu na Mei 2022 caba Parlamento a indica di ta contra e RAFT, na Parlamento den e reunion ultimo di dia 7 di September, a bin un mocion number 7 cu a wordo carga pa mayoria cu ta indica e ora ey cu gobierno di Aruba tin cu bay haci esaki cla na Hulanda, splica cu no tin consenso y locual automaticamente ta nifica cu RAFT no por sigui wordo negocia.
E parlamentario, Lider di Fraccion di MEP, a agrega cu si Parlamento bisa pa Gobierno di Aruba sigui negocia riba otro beneficionan of bentahanan riba otro puntonan di interes y no continua cu e mesun ley di consenso cu yama RAFT.
A sigui bisa cu practicamente den Parlamento dos persona so ta sostene e ley di RAFT manera cu e ta. Esaki ta Sr. Miguel Mansur y tambe Sra. Marisol Lopez-Tromp.
Locual si a mira, a indica, cu den Parlamento a tuma lugar, den e fraccion di MAS mes unda tin Sra. Gunn y Sra. Lopez-Tromp, cu na comienso Sra. Gunn a sali bisando cu e no kier RAF manera cu e ta y cu e kier mira cambio den dje, cual ta trece un division, un pensamento robes compara cu su lider di MAS.
Los di esey a mira tambe cu oposicion, den e prome mocion, cu no a wordo entrega pa Sr. Miguel Mansur, ta mira eynan cu Sra. Gerlien Croes a bay di acuerdo cu e mocion cu nan tin. Pero ta mira cu den e di dos reunion unda cu e entrega e mocion pero amplia, ta mira cu e firma di Sra. Croes no tey mas, pero esun di Sra. Lopez-Tromp a bin acerca, a bisa.
Fraccion di MEP ta compronde cu ora cu omo di Sra. Gerlien Croes, Sr. Duque Croes, Lider di fraccion di AVP añanan atras, a splica Sra. Croes con por vota pa un mocion asina aki cu ta incrimina tur e parlamentarionan, siendo cu Duque Croes tabata lider di fraccion di AVP.
E ora por a mira con Gerlien Croes a kita su firma y a laga e oposicion cay, lagando Mansur y Marisol nan so ariba e mocion aki, Tevreden a splica.
E mocion ta bisa cu Aruba tin un falta di cumplimento pa cu Hulanda. E pregunta na e parlamentarionan aki ta for di ki tempo Aruba ta den incumplimento cu Hulanda, for di ki tempo ta den default pa su fiansanan den exterior. Ningun momento, a remarca.
Aruba ta cumpliendo y ta negocia pa un miho deal pero esey no ta nifica cu Aruba ta den incumplimento. E parlamentarionan den oposicion ta bisa cu Aruba ta den incumplimento.
Finalmente, e parlamentario di MEP a mustra pakico Sr. Mansur y Sra. Lopez-Tromp a bay di acuerdo cu RAFT. Aruba por paga solamente 6% di interes. "Nos a compronde di gobierno cu e negociacionnan ta andando pa locual ta e fiansa cu tin cu paga bek na October. E 916 miyon florin cu a wordo fia na October of cu tin cu wordo cuminsa paga na October ", a señala.
Locual gobierno tin riba mesa ta cu den e proximo dos añanan ora cu mester cuminsa paga bek, e lo ta di 5.1% pa dos aña. Esey ya nifica cu si e mercado ta na 6% y manera Hulanda ta bisa cu si Aruba no paga of si bay aworaki direct den RAFT ta bay pa 3.1%.
E 6% cu ta riba mercado internacional, pa dos aña ta bay ta mara na 5.1% y esey ta mira cu ta un diferencia di 0.9% di interes cu ta suma den 900 mil florin.
A expresa cu atrobe e discusion di entrega e autonomia financiero di pais Aruba realmente pa e proximo dos añanan aki ta bay pa 900 mil florin. "Pa 900 mil florin, Sra. Lopez Tromp, Sr. Mansur kier entrega e finansas di Aruba na Hulanda.
Pa 900 mil florin pa aña di interes nan kier atacha e 'budgetrecht' di Parlamento di Aruba. Tambe kier kita e historia pakico a bringa p'e desde aña 86. Asina kier bende Aruba su historia y su futuro na e hulandesnan pa asina anan tuma over e administracion financiero di pais Aruba y elimina e bos di parlamento, Hendrik Tevreden a expresa.
Fraccion di MEP ta haya esaki inaceptabel.
