Segun Parlamentario John Hart di fraccion di AVP:
ORANJESTAD (AAN) - Mientras cu tin politico ta insisti pa papia di cambio, toch nan ta wanta duro na un pasado politico cu ya a bay for di moda.
Dos siman pasa Minister di Economia y Finansa a informa ampliamente riba progreso di e proyecto di revitalisacion di San Nicolas y el a amplia riba e plannan cu gobierno tin pa cu San Nicolas.
Bishita di Prome Minister Eman den ultimo simannan na varios sitio na San Nicolas ta confirma con, pa ocho aña largo, e dos gobiernonan di MEP practicamente a neglisha desaroyo y progreso di e bario aki por completo.
Ta den e contexto aki tin cu analisa e ponencianan di lider di partido PPA, Otmar Oduber, kende ta sigui cuestiona un gobierno cu apenas tin cuater luna trahando duro pa recupera e retraso ocasiona pa entre otro gobierno cu Otmar Oduber tabata parti di dje pa tres aña largo.
Ora cu scucha e ‘representante’ di PPA cuestiona e actual gobierno di no kier asfalta Teresitaplein, ta bon pa analisa con, pa casi ocho aña largo, a laga e plenchi aki deteriora den e forma cu e ta na e momentonan aki.
For di fin 2017 te fin di 2019, e lider actual di PPA tabata responsabel pa e ministerio di infrastructura, bou di cual Departamento di Obranan Publico (DOW) tambe ta cay. Sinembargo, nunca Otmar Oduber a inclui den e dos presupuestonan cu el a presenta, ni un solo florin pa drecha e plenchi aki na San Nicolas.
Na december 2019, Oduber a dicidi di bandona gobernacion di su pais pa atende cu su propio negoshinan. Awo di ripiente y eherciendo e mesun politica anticua, Otmar Oduber kier crea e impresion den pueblo cu ta e gobierno di AVP no tin interes di San Nicolas na pecho.
E observacionnan populista aki di parti di Oduber no ta resona meymey di e ciudadano, ya cu tur tin bon cla cu realmente ta for di 2019 Otmar a bandona politica di Aruba, incluyendo e pueblo di San Nicolas. El a bandona e vision cu e mes a crea, pa su propio interes y no esun di pueblo.
