Eddy Bennett, Secretario General, ta anuncia:
ORANJESTAD (AAN) “Bon vision, maneho planifica y prosperidad. Esey ta locual PPA y señor Otmar Oduber tin en comun”, señor Eddy Bennett, Secretario General di Partido PPA, a informa, anunciando e entrada di señor Otmar Oduber, como lider di PPA.
Señor Bennett a informa, cu Diaranzon cu a pasa, señor Otmar Oduber, kende den oranan di anochi a haya e aprobacion rotundo di su campañadornan y seguidornan pa uni Partido patriotico di Aruba, PPA cu su organizacion Nos PAIS y pa lidera e Partido Patriotico di Aruba, PPA.
E aña aki 23 di October Partido Patriotico di Aruba, PPA, ta bay celebra e hecho cu 75 aña pasa a worde funda pa señor Juan Enrique (Juancho) Yrausquin, den feliz memoria. Mirando e dedicacion cu PPA tin den tur su añanan di existencia, señor Oduber tambe ta un persona cu tin e mesun dedicacion.
“Mi persona hunto cu lider di partido, Otmar Oduber, lo haci e bon vision, maneho planifica y prosperidad un realidad pa Aruba”, señor Eddy Bennett, Secretario General PPA, a duna di conoce.
