Rudy Richardson (MEP):
ORANJESTAD (AAN): Dia 9 di februari, 2023 Partido Movimiento Electoral di Pueblo (MEP) a cumpli 52 aña di existencia como organisacion politico. Si wak bon e organisacion a bin ta crece den e mundo politico tanto local, den Reino, den comunidad internacional y regional.
Cu liderasgo di nos fundador y lider maximo Arubano Gilberto Francois (Betico) Croes pa Nelson O. Oduber y actual lider Evelyna Wever Croes ta algo sumamente excepcional unda a buta e partido durante mas di mey siglo den gobernacion di nos pais Aruba. No ta necesario pa expresa e logronan historico di partido MEP (prome partido politico cu a organisa un referendum den Reino Hulandes) desde cu e pandemia mundial MEP a mustra di ta un partido cu capacidad pa goberna den temponan mas turbulento.
Gabinete Wever Croes I
Partido MEP a drenta gobierno na 2017 den un coalicion MEP\POR\RED y a logra saca Aruba di e abismo cu e tawata aden door di e gobierno anterior, unda nos isla tawata esun di mas malo den Reino Hulandes. Nos debe nacional tawata fo’i balansa den contexto di tur otro isla cu desaroyo similar. Hopi kisas ta lubida cu ta partido MEP a tuma e responsabilidad pa drecha locual a wordo destrui.
Pandemia Covid 19
Aruba y su pueblo a drenta un pandemia mundial pa dos aña unda mester a presta 1 biyon florin pa wanta nos civilizacion na bida cu ayudo di nos partner di mas grandi den Reino cu ta Hulanda. Si pais Aruba tawata tin buffer esaki no lo tawata necesario pero door di un debe nacional insostenibel mester a negocia fuertemente cu Hulanda pa no perde nos Status Aparte\Autonomia den Reino Hulandes.
Gabinete Wever Croes II
Partido MEP a drenta gobierno na 2021 den un coalicion MEP\RAIZ y ta trahando duro pa recupera locual nos a perde di mal gobernacion anterior y un pandemia mundial. Nos turismo cu ta nos fuente di entrada mas grandi ta casi na nivelnan pre covid. Por hasta papia di un RevPar mas halto pero kisas cu menos ocupacion, pues en principio algo sumamente positivo mirando cu nos pais ta keda uno hopi atractivo pa esnan cu kier paga balente placa pa hospeda na Aruba. Door di esaki tambe gobierno ta enfoca riba trece mas seguridad den areanan hotelero y publico en general. Gobierno tin e tarea di maneha nos pais cu recursonan hopi limita pero cada conciudadano mester ta consciente cu nos tur tin cu carga responsabilidad pa nos actonan.
Retonan actual interno di partido
Tambe tin cierto investigacionnan andando cu miembronan di nos organisacion politico y esaki tambe a wordo trata cu tur seriedad door di liderasgo di nos lider Sra. mr. Evelyna Wever Croes. MEP tin un stuctura democratico unda cu cada candidato ta responsabel pa nan actonan. Nos ta solidario cu nos coleganan pero mane ta bisa na nos idioma cada ken mester sinta riba nan blaar. Trias politica ta esencia di nos democracia y nos ta respeta esaki y laga tur stakeholders haci nan trabao cu e denuncianan haci.
Retonan cu e comunidad Homosexual
Como candidato di MEP mi mester respeta cada conciudadano su derechonan constitucional. Cada un di nos di e pueblo aki tin nos opinion riba e tema di matrimonio homosexual. Semper mester buta tur cos den contexto y wak unda nos por yega na otro na un manera civiliza. Nos mester por duna e grupo aki di nos comunidad nan derecho di existencia sin trapa riba e mesun derecho di esnan heterosexual esaki ta unda e reto ta y mester hiba dialogo cu tur stakeholders den nos sociedad pa por regla e asunto aki. Tur pais den Reino ta regel esaki na nan manera y conforme e norma y cultura di cada pais.
Futuro di MEP
Mi ta kere cu e futuro di nos organisacion politico Movimiento Electoral di Pueblo ta un cu mester ta basa riba trato husto y corecto basa riba principionan social democrata cu un balansa entre ex candidatonan, ex ministernan, ex parlamentarioan hunto cu nos nucleo di sostenedornan, p’esey nos ta un Movimiento, esaki ta esencia di nos organisacion. Cu Dios bendiciona Aruba y nos digno Pueblo.
