Fraccion di MEP:
*Den un democracia fuerte no por tin miedo di debate
ORANJESTAD (AAN): Parlamentarionan di Fraccion di MEP Edgard Vrolijk, Dangui Oduber y Endy Croes den un reunion publico diamars ultimo, a lansa critica fuerte un biaha mas riba e maneho di Presidente di Parlamento Marlon Sneek. “Nos ta contento cu bo a yama e reunion aki, cu nos a pidi apenas 6 siman pasa.
Sinembargo, e ta straña nos aun mas ta ki maneho ta wordo implementa aki na Parlamento. Pasobra si bo analisa e cifranan, e ta mustra un patronchi peligroso”, segun e parlamentarionan.
For di januari 2025, MEP a haci 41 peticion: 24 pa reunion publico, 15 pa encuentro publico y 2 pa ora di preguntanan. Di e 41 peticion, solamente 11 a wordo yama. 30 no a wordo yama ainda. Mientras tanto, peticionnan di otro fraccionnan, specialmente di e partidonan di coalicion, den mayoria di e casonan si a wordo yama.
“Nos no ta bisa cu tur peticion mester wordo honra. Pero e trato mester ta igual pa tur fraccion. Parlamento no ta di coalicion; Parlamento ta di pueblo. Ora peticionnan di oposicion sistematicamente no ta wordo agenda, e derecho di control y debate democratico ta wordo limita. P’esey nos ta pidi mas transparencia den e maneho di Presidente di Parlamento. Mester tin criterianan objetivo y trato igual pa tur fraccionnan. Den un democracia fuerte no por tin miedo di debate. E ta garantisa cu tur bos por wordo scucha”, lider di fraccion di MEP Evelyn Wever-Croes a duna di conoce.
