Parlamentario Jennifer Arends-Reyes:
ORANJESTAD (AAN): Un di e prome topiconan cu parlamentario Jennifer Arends-Reyes a trece dilanti durante e conferencia di prensa di fraccion AVP diamars mainta, ta e cantidad grandi di tempo y esfuerzo cu miembronan di oposicion a hinca durante ultimo lunanan pa crea video, manda shen di pregunta aden pa ministernan di Gabinete AVP/FUTURO exigiendo solucion riba e problemanan cu nan mes a laga atras.
‘Nan ta lubida cu ta nan mes a cab’i sali como ex-minister di e posicionnan aki,’ e parlamentario ta remarca. Den vakantie atrobe ta propone solucionnan, pero ta for di e mesun personahe cu tabata minister den e cartera concerni, y cu den mas cu 7 aña no a concretisa, pero awo si kier pa den 5 luna di tempo AVP/Futuro tin solucion y resultado cla.
Despues di reces, parlamento ta ranca sali cu tratamento di presupuesto supletorio 2025 y presupuesto 2026 den cual ta mantene palabracionnan financiero cu ta incorpora cambio pa resto di lunanan di 2025. Presupuesto supletorio, por ehempel, ta duna un bista di proyectonan andando, pero tambe inversion adicional cu ta den tapara y ta enfoca riba e calidad di bida di tur cu ta biba riba nos isla.
Asuntonan manera flexibilisacion di mercado laboral, acceso na vivienda, mehoracion di procesonan y investigacionnan di e maneho anterior ta andando. Ta importante pa pone ordo, wak kico a bay robes y duna prioridad na e asuntonan mas urgente.
Parlamentario Arends-Reyes: ‘Aruba merece un gobierno stabil y mi ta sigur cu den e parti aki tanto fraccion di AVP y Gabinete AVP/FUTURO ta tuma nan trabou sumamente na serio; consciente cu Aruba merece un pais caminda e ciudananonan por biba trankil y tin hopi miho prospecto di biba un bida digno.
