Parlamentario John Hart, Fraccion di AVP:
ORANJESTAD (AAN)- Parlamentario di fraccion di AVP, señor John Hart, den entrevista cu DIARIO a declara cu nan ta sigur, preocupa cu cierto desaroyonan cu ta tumando lugar, pero e preocupacion aki no ta di awor cu nan tine, pero como Presidente di Comision di Husticia, mesora cu Aña Parlamentario a habri, el a pidi un reunion cu e Minister, den forma di un vragen uur.
“Mi a pidi tambe un reunion den Comision cu Minister, pero tambe cu Altocomisario, pasobra mi ta kere ta importante pa nos trece cabesnan hunto y pa nos hiba den Parlamento discusionnan fundamental riba Husticia. E ta di lamenta pa nos mira den oposicion con nan ta actua, pasobra ora mi a trece aki den reunionnan importante tocante combatimento di criminalidad, riba prevencion, y con nos ta bay atende cu esakinan, segun mi tres siman pasa, fraccion di MEP boicotea y stroba full un reunion, caminda cu nos por a hiba combersacion con nos ta bay atende cu asuntonan di gang, cu asuntonan di siguridad den trafico, stroba y bisa cu si nos no ta papia di e jet priva nan no ta papia di nada mas den Sala di Parlamento.
Esaki no ta manera cu nos tin cu atende cu temanan asina serio, y e ta conta akinan tambe pa e Parlamentario di PPA, un extension di MEP. E ta tristo, mi ta prefera miho señor Otmar Oduber ta den Parlamento, pasobra por lo menos e tin weso di lomba”, Hart, a expresa.
E Parlamentario a agrega cu un peticion a keda entrega na Presidente di Parlamento, pa e minister bin hasta hunto cu Altocomisario, y si ta p’e trece PG tambe. “Laga nos tur sinta aki den, anto ban atende cu e temanan fastioso aki. Y locual ta trata loke a pasa algun dia pasa cu señor Croes, cu a fayece, palabra di condolencia, pero segun mi por a compronde tin un investigacion awo ta andando; e ta dificil pa mi bay duna un declaracion aworaki riba esaki, pero un cos si ta importante, cu nos hendenan mester tin e confianza den nos Institutonan. Mi ta scucha politiconan insinua cu kizas polis a haci fout, esey nos no sa. Esey, investigacion tin cu duna esey”, Parlamentario Hart, a señala.
El a bisa cu pa loke ta trata e mocion cu a wordo entrega tocante bodycam, etc., no ta prome biaha e ta papia riba esaki. “Mi a entrega un mocion e tempo ey, preguntanan a wordo haci na e Minister. E Minister a bin Parlamento y a contesta cu tabata tin un pilot tabata tumando lugar, pero ora mi a yama e reunion pa habri e tematica aki nan a boicotea e reunion. Pa nan jet priva tin mas importancia cu atende con nos ta bay on cu armanan, pasobra tin hopi arma riba caminda y nos tin cu atende cu e temanan aki”, Parlamentario John Hart di fraccion di AVP, a señala.
