ORANJESTAD (AAN): Diaranson mainta aparentemente awa a pasa hariña cerca fraccion di MEP den Parlamento,
y a wordo anuncia door di lider Evelyn Wever-Croes riba social media, cu nan a haci entrega di un mocion di desconfiansa contra Ministro Gerlien Croes.
“Ora cu un Ministro deliberadamente gaña Parlamento, Parlamento mester duna e señal corecto: Gaña Parlamento ta inaceptabel”, Wever-Croes a bisa. Den mesun rosea el a indica: “E mocion di desconfiansa no ta pa debilita Gobierno, pero pa fortifica Parlamento.”
E motibo cu a yega te na e extremo aki y cu pasenshi a caba cu Ministro Gerlien Croes, ta cu nan den Parlamento tin ya caba 4 siman ta pidi claridad di Ministro riba e asunto cu a uza un avion priva pa viaha pa Curaçao. Cuatro siman largo pueblo pues ta exigi pa haya sa kico ta kico. Ministro Gerlien na forma vago a bisa cu “el a paga”, mientras cu e doño di avion ta bisa cu “e no a paga”. Ministro no a bisa “na ken el a paga”, tampoco a bisa “cuanto el a paga”, mucho menos “ki dia el a paga”.
Pa Wever-Croes, pues Ministro ta gañando.
Deadline di pasenshi a yega awor, y a desemboca den un mocion di desconfiansa. Un Ministro di ta gaña Parlamento, no por keda asina comosifuera nada no a pasa.
Cu tur e puntonan poni riba e Mocion di Desconfianza, e fraccion di MEP a indica cu e Ministro no ta disfruta mas di confianza di nan. No a tende nada di parlamentario Mike de Meza ki opinion e lo tin riba e asunto aki.
