Presidente di Parlamento Edgard Vrolijk tocante RAft:
ORANJESTAD (AAN) – Presidente di Parlamento mr. Edgard Vrolijk tambe ta preocupa, pasobra Parlamento tambe a firma un acuerdo, unda entre otro, nan a acepta e placa necesario na e momento ey y ni un momento nan a nenga di paga.
Esey ta nan punto di salida semper, pero nan pregunta ta di con nan tin cu haya un straf rente mirando cu enberdad Hulanda kier forza gobierno cu un Rijkswet.
“Nos no tin miedo di supervision. Supervision tey caba, pero e mester ta husto si y esey nos a debati. E RAft tin hopi punto cu lo perhudica Aruba, y mi tin sigur cu si Hulanda lo tabata tin entendimento riba esaki, a trece cambio riba nos peticionnan awor nos no tabata papiando di e escenarionan aki. Nos lo tabata preparando un Rijkswet, probablemente, pa bay in place. Pero e problema ta sinta cu e Rijkswet aki no tin beneficio pa Aruba, unico cu e ta bay haci ta stroba Aruba den su crecemento economico, un salida di cual nunca mas nos lo por sali; nos no ta di acuerdo cu esey. Y sigur nos ta mara na un fianza di 20 aña cu nan ta bay bin cune”, Presidente di Parlamento mr. Edgard Vrolijk a señala.
Vrolijk a sigui bisa cu na e momentonan aki Parlamento tin claridad. Aruba tin cu bay paga 6.9% na interes, pero nan ta den negociacion, keto bay, pa un “hybridum” conforme locual Prome Minister a trece dilanti, y si por logra esey, cambiando e LAft, den futuro Aruba tambe por haya un interes di 3.4%, mescos cu Sint Maarten y bayendo 5.1% manera Curacao si Aruba y Hulanda lo yega na un acuerdo cu otro.
“Nos ta un grupo responsable y nos sa kico esaki ta nifica pa pueblo di Aruba, pero esey no kiermen cu bo por yega tuma tur cos di awe pa mañan. Nos tin cu bataya, pasobra tur cos cu ta facil. Nos no a haya nos Status Aparte di coba den nanishi. Nos a haya door di traha duro, y atrobe mi ta bisa cu nos no ta bringa pa no paga, nos ta bringa pa paga lo husto si, y esey kiermen cu na momento cu un Parlamento Hulandes ta bisa bo cu nan ta duna bo un mocion pa haya un straf rente. Ami y mi Parlamento kier manda tambe un mocion, bisa nan cu nos kier un quickschellen, pero nan no a ni worry cu ne”, Presidente di Parlamento a menciona.
Vrolijk a remarca cu manera e ta bisa den Parlamento, politiek Den Haag ta drentando mucho na Aruba, loke ta daña relacionnan den Reino y ta crea friccion den cosnan cu mester a bay facil.
