Parlamentario Eduard Pieters:
ORANJESTAD (AAN): Hulanda a pidi disculpa. Awor e pregunta ta: kico ta sigui despues di e disculpa? Esey tabata un di e temanan trata durante e reciente Tripartite na Corsou, caminda e Parlamentonan di Aruba, Corsou y Sint Maarten a delibera tocante slavernijverleden, pasado colonial y e impacto cu esaki ainda por tin riba e generacionnan di awe.
Pa parlamentario Eduard Pieters (PPA), Aruba mester participa activamente den e proceso, pero cu un condicion importante: Aruba mester conta su propio historia.
For di disculpa pa accion: Na december 2022, Gobierno Hulandes a ofrece disculpa oficial pa e rol cu Estado Hulandes a hunga den sclabitud riba e islanan. E proceso no a termina cu e disculpa. Hulanda a destina €200 miyon pa conocemento y conscientisacion, reconocemento y conmemoracion y pa atende e efecto cu pasado di sclabitud ainda tin den sociedad.
Parti di e fondo ta destina specificamente pa e iniciativanan den parti Caribeño di Reino. E programa ta inclui investigacion, enseñansa, patrimonio cultural y e proyectonan social relaciona cu reconocemento y procesamento di e pasado. Pa Pieters, Aruba mester uza e oportunidad aki pa bay mas profundo cu ceremonia y conmemoracion.
Historia di Aruba no ta copia di otro isla: Aruba, Corsou y Sint Maarten tin un pasado colonial comparti, pero nan historia no ta identico.
Incluso Gobierno Hulandes a reconoce esaki. Durante disculpa oficial na Aruba na 2022, a señala no solamente sclabitud na Aruba, sino tambe cu ainda tin mucho pa investiga tocante experiencia historico di e poblacion indigena. Pa Pieters, esey tambe importante.
E pregunta, segun Pieters, no mester keda solamente na kico a pasa? Mester puntra tambe: “Kico e pasado a laga atras?” Den identidad, e relacionnan social, e oportunidadnan, liderazgo y e manera con e generacionnan nobo ta mira nan mes.
Gobierno Hulandes mes ta reconoce cu efecto di sclabitud y colonialismo por sigui manifesta den desigualdad, discriminacion y racismo y ta pone “verwerking” y “herstel” como parti di e trayectoria. Pa Pieters, Aruba mester determina con e trayectoria ey ta mira pa nos realidad.
“Nos no por cambia nos pasado. Pero nos por conoce, acepta, compronde y sana loke e pasado a laga atras, pa e cicatriznan di pasado, no sigui determina ken nos ta bira mañan,” Eduard Pieters a finalisa bisando.
