Parlamentario Dennerich Kelly di AVP
ORANJESTAD (AAN): Miembro di Parlamento pa AVP, Sr. Dennerich Kelly, a enfatisa cu e preocupacion creciente den comunidad tocante e subida di costo di bida ta real, husto y merece un debate serio y responsabel. Na supermercado, na pomp di gasolin y den cas di hopi famia, pueblo ta sinti cu bida ta bira cada dia mas costoso. Pa hopi famia, adulto mayor y trahadonan cu entrada medio y abou, poder di compra no ta un concepto abstracto, sino un realidad diario.
Segun parlamentario Kelly, hopi hende ta lansa e pregunta: “Unda gobierno ta?” E pregunta ey ta completamente legitimo. Pero, pa su persona, e contesta ta exigi nuansa, claridad y honestidad, y no un respuesta simplifica pa beneficio politico.
“Nos mester ta cla riba e punto cu no tur prijs ta den man di gobierno,” Kelly a declara. “Aruba ta un economia chikito y habri, cu ta depende hopi riba importacion. Esaki ta nifica cu prijs di producto basico, combustibel y otro necesidad ta determina en gran parti pa factornan internacional manera prijs di petroleo, costo di transporte y desaroyonan den mercado mundial — factornan cu ningun pais por controla completamente.”
Kelly a enfatisa cu esaki no kiermen cu gobierno no tin un rol importante. Al contrario, responsabilidad di gobierno ta pa evalua, tuma decision prudente y aplica medida cu por suavisa e impacto riba pueblo, sin pone stabilidad financiero di pais na riesgo.
Den e contexto aki, parlamentario Kelly a referi na e explicacion presenta recientemente den Parlamento pa Minister di Finansa, Asunto Economico y Sector Primario, mr. Geoffrey Wever. Segun e informacion presenta, Gobierno AVP-Futuro ya a tuma varios paso concreto pa proteha consumidor y poder di compra, incluyendo un reduccion temporario di accijns riba combustibel, medidanan pa mantene stabilidad den prijs di utilidadnan via hedging, y continuacion di iniciativa manera reparatietoeslag. Ademas, gobierno ta traha cu un mitigatienota basa riba scenario, monitor continuo y coordinacion entre institucionnan relevante pa actua na momento corecto.
Parlamentario Kelly a destaca cu liderazgo no semper ta nifica reacciona mas liher, sino tuma decision basa riba data, analisis, conseho di experto y sentido di responsabilidad. Pa un pais manera Aruba, cu espacio fiscal limita, decisionnan apura por crea alivio temporal, pero tambe por causa problema mas grandi riba largo plazo.
Na mes momento, Kelly a reconoci cu e preocupacionnan den comunidad no por wordo minimalisa. Cada subida di prijs ta sintie den bida diario di hopi hende. P’esey, e ta esencial cu politica publico sigui enfoca riba proteccion di e gruponan mas vulnerabel y fortalecimento di poder di compra unda esaki ta posibel.
Den su rol como miembro di Parlamento, Kelly a enfatisa cu supervision y responsabilidad continuo ta parti esencial di su trabao.
“Como miembro di Parlamento, mi lo sigui monitor e situacion di cerca, exigi claridad y transparencia tocante e medidanan cu ta tuma, y keda den contacto cu e preocupacionnan den comunidad, pa garantisa cu e decisionnan ta mantene conecta cu e realidad di nos pueblo.”
Den su declaracion, Kelly a indica cu den e debate publico mester tin mas claridad tocante cual prijs gobierno por influencia directamente y cual no. Pa su persona, esaki ta importante pa construi expectativa realistico y permiti cu pueblo y gobierno por traha hunto riba solucionnan sostenibel.
“E reto cu nos tin dilanti ta mas grandi cu awe so. No ta solamente con nos ta reacciona riba e situacion actual, sino con nos ta prepara pa loke por bini,” Kelly a expresa.
Den un mundo cu ta bira cada bes mas impredecibel, Aruba mester sigui tuma decisionnan bon balansa y responsabel. Como representante di pueblo, mi lo sigui cumpli cu mi deber pa controla y monitor e pasonan cu gobierno ta tuma, semper cu interes di nos pueblo na prome lugar.
