Parlamentario Evelyn Wever-Croes:
ORANJESTAD (AAN): Durante su disertacion den e reunion publico cu a tuma luga diamars, Parlamentario Evelyn Wever-Croes a enfatisa cu sin duda, e texto di e Ley di Reino Hofa, a wordo acorda entre gobiernonan di AVP-Futuro y di Hulanda dia 13 di augustus 2025.
Parlamento a haya e documento fecha dia 20 di augustus 2025, cu ta prueba esaki na unda literalmente ta indica cu dia 13 di augustus 2025, durante un encuentro riba nivel di gobierno, gobiernonan di Hulanda y Aruba a yega na un acuerdo riba e texto di e ley di Hofa. E documento aki ta contene 46 pagina y dia 29 di augustus ultimo, Parlamento a haya esaki pa mira ora cu Gobierno a presenta esaki den sala di Parlamento.
Cu esaki, Parlamentario Wever-Croes ta aclarea ken a firma y kico a wordo firma pero principalmente, cu no ta e a firma e rijkswet Hofa. “Si un politico ta tuma su mes na serio, e ta stop di uza argumento cu tur sa cu no ta corecto pasobra no tin ningun duda cu esun cu si a firma e ley aki ta e Gobierno AVP-Futuro. Tambe tur politico serio mester sa cu loke ami a firma na 2024, no ta ‘bindend’, e no ta mara ni Gobierno ni Parlamento.
