Parlamentario Lindor di en conexion cu Dia Internacional di Hende Muhe:
ORANJESTAD (AAN): Segun Ruthlyn Lindor di Fraccion Futuro, rond mundo tin un escalacion di violencia contra hende muhe. Sea ta violencia verbal, fisico, psikico, of psicosocial. Mas ainda, e Parlamentario a expresa su disgusto ora e ta wak riba medianan social especialmente, cu hende muhe ta caba cu hende muhe.
Parlamentario Lindor a expresa cu den hopi caso di violencia, ta pasobra e hende homber hopi biaha no ta comprende cu nan ta esnan cu mester sali na defensa di hende muhe. Y ni kico cu e hende muhe por a haci, no tin nada na mundo cu ta hustifica pa un hende muhe ser agredi.
Ora cu no tin comprondemento di esaki, e parlamentario a expresa, ta un consecuencia cu ya a cuminsa perde respet pa e hende muhe den nos comunidad. Ora cu un persona, sea homber of muhe, agredi un hende muhe verbalmente, e stap ta bira hopi chikito cu lo agredi e hende muhe fisicamente tambe.
Parlamentario Lindor a enfatisa cu mester cuminsa mas agresivo riba e parti di conscientisacion especialmente na cas. “Nos no ta lanta man pa dal niun hende y especialmente, niun hende muhe. Nos tur a nace, y a wordo cria door di hende muhe y sin nan, nos niun lo tey”, el a expresa.
Segun e Parlamentario, hopi biaha nos ta spera hopi di e hende muhe y no ta tene cuenta cu salud en general. Falta mas conscientisacion riba cuido medico y tambe pa sostene e hende muhe durante nan malesa por ehempel e malesa endometriosis. Luna di maart ta e luna di endometriosis y hopi hende muhe no ta haltura kico e malesa aki ta pero si tin hopi hende muhe cu ta sufri di dje aki na Aruba.
El a agrega cu na otro parti di mundo hende muhe por haya un extra dia liber of otro acuerdonan di trabao mientras nan ta indispuesto debi na e malesa aki. Na Aruba no tin e flexibilidad aki. “Esaki ta cay den cuido medico y nos mester eleva esaki na Aruba”, e parlamentario a enfatisa.
Na final di su entrevista cu DIARIO, Parlamentario Ruthlyn Lindor a duna su mensahe pa tur hende muhe riba Dia Internacional di Hende Muhe dia 8 di maart proximo: “Hende muhe ta un ser resiliente, cu curashi, balente y cu balor. Mi peticion ta pa cada un hende muhe habri caminda pa otro. Ban yuda otro y inspira otro y ban lidera y guia e generacion cu ta bin. Mi ta desea tur hende muhe un feliz Dia Internacional di Hende Muhe”.
