Parlamentario Rocco Tjon:
*Apesar cu ta un mocion acepta y aproba unanimamente!
ORANJESTAD (AAN)-- Parlamentario di Fraccion di MEP, señor Rocco Tjon, a referi, den un entrevista cu Matutino DIARIO, na un mocion cu Parlamento a acepta y aproba unanimamente tempo cu Gabinete Wever-Croes 2, tabata demisionario, prome cu AVP-FUTURO a forma gobierno.
Tjon ta referi na e mocion pa otorga mas fondo pa e tereno di husticia y garantiza cu KPA por a ricibi nan “body cams”, entre otro ekiponan pa polis, loke no a tuma lugar y e Presidente di Sindicato di Polis a reacciona den un carta pa e Comision di Husticia.
“Ya eleccion a pasa y formacion tabata tumando lugar entre Partido AVP y Futuro, y net den e temporada ey e mocion a wordo acepta. Despues gobierno a wordo forma y den e prome dia di trabao, nan a corta 10% riba e presupuesto”, Parlamentario Tjon a señala.
E motibo pa cual Parlamento a bay di acuerdo cu e mocion indica, ta basa riba e hecho cu e mayoria di e puntonan menciona den dje tabata den ehecucion y tabatin presupuesto p’e tambe.
Tjon a duna un ehemplo concreto unda e ta bisa: “Si bo kier cumpra ballet proof vest nobo pa KPA bo mester di fondo. Nan ta costa placa. Awo, si riba bo prome dia di trabao bo corta 10% den e presupuesto di Cuerpo Policial, obviamente bo no por cumpra e ballet proof vest aki mas”, Parlamentario Rocco Tjon a remarca.
El a agrega otro ehemplo; el a scucha y lesa e carta di sindicato di polis, unda un preocupacion grandi ta e parti di salud mental.
“Casonan cu ta wordo confronta cu ne, pero tambe e cuido y atencion pa e personal mes. Na aña 2023 of 2024, nos a provee Cuerpo Policial cu diferente curso riba e tema aki specificamente. Nos a aloca fondo, e tempo pa e sector ey mi tabata encarga cu e parti di salud mental tambe, pa hunto cu Repaldo y Mental Health Caribbean di Bonaire, e tempo ey pa den nos tres duna e training aki na KPA, y e resultado mester tabata cu ta den un convenio tambe ta bin Crisis Team, 24/7 ta na disposicion di Cuerpo Policial. Obviamente, ora bo corta den presupuesto, atrobe tur esakinan ta tranca mesora. Kiermen, na final di dia, e mocion aki mi ta convenci, cu no por a wordo ehecuta door di gobierno, pa motibo cu nan a corta den diferente presupuesto”, Parlamentario Rocco Tjon a reitera.
