Presidente di Parlamento Marlon Sneek:
ORANJESTAD (AAN): Presidente di Parlamento Marlon Sneek a cuminsa cu un entrevista enfatisando cu tur Parlamentario tin derecho di entrega un mocion sea den prome tanda como den e segundo tanda. Pa esaki, Sneek a remarca, no tin un momento defini pa entreg’e pero si cu mester entreg’e prome cu reunion cera.
Den e caso di e reunion recien cu Minister Geoffrey Wever riba e ley di LNT, Presidente di Parlamento Sneek a accentua, cu e reunion no a cera pero tawatin un schorsing. El a agrega cu Minister Geoffrey Wever a presenta pa busca ‘gevoelens’, pa conoce e pensamento di Parlamento riba e ley di LNT.
Segun e, Parlamento mes a pidi pa haci un investigacion y ta pa e motibo ey e minister a pidi un schorsing pa bay haci loke Parlamento a pidi. Segun e, e minister lo bay haci su investigacion y lo bolbe presenta den Parlamento proximamente pa e debate riba e tema continua.
“Loke tawata mas importante di e reunion ta cu a pidi pa haci un investigacion y e minister a bay haci investigacion. Ami ta haci mi trabou na ‘eer en geweten’ y mi tin mi consenshi na paz y mi sa cu mi a dirigi e reunion en cuestion pa nos saca e miho pa nos hendenan”, Presidente di Parlamento Marlon Sneek a expresa.
