Parlamentario Edgard Vrolijk:
ORANJESTAD (AAN) – Parlamentario Edgard Vrolijk, di Fraccion di Movimento Electoral di Pueblo (MEP), a participa den e conferencia di prensa semanal, Diaranzon cu a pasa.
Vrolijk a haya hopi importante pa para keto un rato y referi na e tema cu ta wordo menciona constantemente, cu ta surplus y cu e ta contento di scucha esey y cu tur hende ta papiando di surplus, pasobra esey ta refleho di un bon gobernacion.
“Un bon gobernacion financiero, siguramente a percura pa en corto termino, Aruba tin placa. Y despues di un pandemia, sigur esaki tabata un reto enorme, unda cu nos mester a percura den pandemia pa pone pan na mesa pa hendenan, nos mester a percura pa fia placa, y tabata momentonan hopi dificil pa Pais Aruba, pero danki Dios, e metanan cu bon intencion, y siguramente tumando decisionnan corecto, awendia nos por papia di un surplus, y un finanzas stabil na Aruba”, Parlamentario Vrolijk a señala.
E parlamentario a bisa cu ora un pais su finanzanan ta stabil, e por duna bek, y esey ta e esencia di loke ta pasando.
El a agrega cu na momento dificil mester a tuma decisionnan cu tabata necesario, y na final di dia gobierno mester a evalua nan, y na momento aki, cu e situacion a cambia, por tuma decisionnan nobo, trece cambionan, y esey ta locual ta wordo haci.
“Un di e prioridadnan cu nos tin, seguramente, mirando cu tin fondo, ta locual ta cuido di barionan, cu ta algo cu ta resalta. Nos tin fondo na e momentonan aki cu ta bay inverti den un ‘investering fonds’ cu ta hopi necesario pa camindanan. Di con ta necesario? Pasobra hopi biaha nos ta pone placa y despues ta cambia di destinacion”, Vrolijk a señala.
Kiermen, na e momentonan aki ta bay bin cu un fondo di inversion dedica solamente pa camindanan. Esey kiermen cu e prioridad ta e camindanan principal, tur bario cu tin caminda kibra, nos ta bay percura pa asfalta y drecha nan, pasobra na e momentonan aki tin un fondo, y naturalmente a crea un fondo di inversion cu tur aña mester pone placa den dje. Kiermen, e compromiso no ta solamente pa drecha nan, pero pa mantene nan tambe. Esaki ta un reto grandi, y mi ta kere cu esey ta e esencia ora bo ta hiba un gobernacion serio!” Parlamentario Edgard Vrolijk a subraya.
