ORANJESTAD (AAN): Riba Diamars, Ministro Gerlien Croes a pone riba social media su punto di bista,
unda e ta nota cu Partido MEP tin 9 luna obsesiona cu ne y ta pidi’e un recibo cu e mes como Ministro no tin niun deber di duna nan!
E ta mira con MEP ta keda continuamente purba kibra su imagen como si fuera el a haci algo robez y e pio ta cu esnan di MEP no ta ni compronde e materia.
Na tur persona, profesional, funcionario, abogado, hues, minister, etc., cu ta haci uso di un vuelo asina, sa cu e gastonan di ‘Landing-Fee’ na Corsou no ta sobrepasa 1.000 Florin, y si el a comparti e gastonan aki, cual ta permiti pa ley tambe, saca boso som!
“MEP ta den parlamento pa controla placa di pueblo, desde ki dia ami tin cu duna Evelyn y Rocco cuenta di loke mi a paga cu mi placa.”
Ministro Gerlien Croes a agrega: “Kisas ex-Premier Evelyn por mustra nos SU bank statements y recibonan di loke e ta paga pa nos wak cuanto placa e tin y con e ta gast’e, paso ami ta 1 salario mi tin, mi no tin negoshi y mi no ta bai hereda niun oficina di abogado cu a gana 9 miyon den 1 gobernacion.”
El a subraya di no a haci nada robes! Y desde prome dia el a bisa cu partido MEP no ta bai defini su bida p’e y tampoco intimid’e cu nan weganan politico.
E siman aki Ministro Gerlien lo bolbe contesta nan preguntanan... un biaha mas, pa di 100 mil biaha. Pero conociendo nan politica bieu cu tur hende ta cansa di dje, nan lo sigi te aña 2036 ainda cu e mesun tema.
Ministro a finalisa bisando: “Mi tin trabou pa haci pa mi pueblo, tin asina hopi cos pa atende cu ne na Aruba, pero parce cu esaki ta keda e prioridadnan di e politiconan den oposicion.”
