Segun Parlamentario Dangui Oduber:
ORANJESTAD (AAN) Parlamentario Dangui Oduber, di fraccion di MEP, den conferencia di prensa a expresa e preocupacion di su fraccion, pa cu e encuesta di Banco Central tocante e confianza di e consumidor, riba Aruba su economia.
Oduber a señala cu e resultado di e encuesta aki di Banco Central ta confirma loke fraccion di MEP a bin ta señala durante e 7 lunanan di gobernacion di Gabinete AVP-Futuro.
“E gobierno aki a hiba un campaña y nan a pon’e riba nan programa di gobernacion, cu nan lo mehora e poder di compra, lo baha costo di bida, y lo percura pa no tin inflacion, y tambe lo percura pa baha tur prijs den supermercado”, Dangui Oduber a relata.
El a agrega cu e ta corda con Minister Geoffrey Wever a bisa cu “frishider na Aruba ta bashi, y nan lo percura pa yena e frishidernan bek, na Aruba”, pero awe.
“Pero awe cu Banco Central a haci un encuesta e resultado ta mustra cu 88% di esnan cu a contesta a indica cu awe nan por cumpra menos compara cu seis luna pasa. Pakico nan por cumpra menos? Pasobra e costo di bida a subi exponencialmente, manera nos a bin ta bisando, no tin caminda mas pa sconde pa sla di prijs; esaki ta loke e entrevistadonan a contesta”, Oduber a reitera.
El a enfatiza cu e costo di bida aumenta desde cu AVP-Futuro a cuminza goberna e pais, e poder di compra a bay atras. “Cu tin inflacion nos tur ta reconoce esaki, menos minister Geoffrey Wever. Durante e periodo di eleccion minister Geofrey Wever a bisa cu e lo percura pa yena e frishidernan bek na Aruba pasobra nan ta bashi. Durante un reunion publico na Parlamento, nos a expresa nos preocupacion y nos a puntra e minister si e ta reconoce e hecho cu costo di bida a subi, cu prijsnan den supermercado a subi exponencialmente cu tin inflacion y cu poder di compra a bay atras. Pa nos sorpresa, envez cu e minister a reconoce esaki y acepta cu esaki ta e realidad, el a bisa nos den Parlamento, cu 99% di prijs na Aruba no a subi”, segun Parlamentario Dangui Oduber.
Parlamentario Oduber a señala cu e minister di economia ta desconecta, desorienta cu e no ta acepta ni ta reconoce cu poder di compra a bay atras.