ORANJESTAD (AAN): Ultimo simannan por a tuma nota cu sr. Mike Eman a cuminsa campaña di desesperacion caminda ta
purba manipula pueblo cu e Gobierno actual no ta invirtiendo den e sector di cuido. Al contrario, ta comentando cu asta ta cortando den sector di cuido medico.
Den rueda di prensa awe mainta, minister Dangui Oduber a elabora ariba 13.5 miyon florin cu a wordo inverti e aña aki den calidad y servicio di cuido. Ta straña nos masha cu sr Eman no a menciona nada di e inversionnan aki. E la opta pa keda keto y no aplaudi e hecho cu miyones di florin ta wordo inverti den mehoracion di cuido medico.
E 13.5 miyon florin cu lo inverti den cuido medico a wordo reparti como lo siguente:
5.1 miyon florin extra pa Hospital
4.1 miyon extra pa ImSan
1.8 miyon pa Stichting BOB haci bevolkingsonderzoeken pa early detection di cancer di pecho
1 miyon pa respaldo pa asina tuma mas profesionalnan
1.5 miyon pa reenforsa e prome liña di cuido y tambe pa digitalisacion di cuido medico
E Gobierno di AVP nunca a inverti den mehoracion den calidad di cuido y servicio.
Al contrario, ora cu Gabinete Wever-Croes 1 a drenta den gobernacion na 2017, nan a haya un Aruba yena cu debe y bancarota. A haya un Aruba caminda sr Eman a kita 60 LUNA di pensioen for di e pensionado. Un Aruba caminda Sr Eman a introduci franchise y middelloonregeling mandando pensionadonan publico 50% atras den nan entradadnan. AVP a laga Aruba atras cu un desater di proyecto di hospital. Un hospital sin ICU, sin sala di operacion, sin isolacion, sin sprinklers di candela y sin cushina. Un hospital cu ainda no ta kedando cla y cu ta costando Aruba 1 biyon florin danki na AVP!
ImSan a wordo completamente neglisha durante e Gobierno di AVP. ImSan tawata tin 22 cama cu tawata para pornada sin uso alguno. Un edificio cu hoping meter cuadra sin uso, gewoon abandona. Awe tur e vierkante meter di e edificio ta wordo bon usa. Imsan ta bayendo asina bon cu e aña aki nan ta bai yega di 1,000 pashent cu nan ta atendiendo di radiologie.
Aruba ta ricibiendo un total di 4 ambulance nobo e aña aki.
E Gobierno aki a subi e pension di biehes pa 4 biaha caba.
E Gobierno aki a reduci e prima di AZV pa nos pensionadonan di 6.5% pa 5%. Asina e pensionado tin mas placa den su cartera y ta mehora nan poder di compra.
Minister Dangui Oduber ta sigui traha y inverti den e sector di cuido y ta spera cu sr Eman ta sostene e inversionnan y ta sostene tambe un siguiente aumento di pensioen di biehez.
