Partido MEP ta convenci
ORANJESTAD (AAN): E ta facil pa compronde! Corda con na aña 2014, Hulanda a pone un KB riba cabez di Eman debi na abuso di placa di pueblo, y con awor na aña 2024, Hof di Corte Superior a impone castigo pa abuso di Benny cu tereno di pueblo.
Hopi ta puntra nan mes ta ken ta kere ainda den Mike Eman, pasobra Mike Eman ta e politico cu mas a abusa di pueblo di Aruba. Aki ta sigui dos ehempel. Mike a abusa di placa di pueblo door di crea un megadebe riba cabes di tur hende y Mike a laga Benny tambe abusa cu tereno di pueblo sin par’e ningun dia.
KB na aña 2014: Tin di corda e nubia scur na aña 2014 Mike Eman a haya un KB di Hulanda pa su mal maneho financiero na unda el a abusa di cartera di pueblo trahando un megadebe riba cabes di tur hende. Mike a redobla e debe di Aruba den un par di tempo cu pueblo a confi’e pa goberna Aruba. E tempo eynan ta Hulanda mester a para Mike Eman, pasobra na Aruba e mayoria den Parlamento no a durf di para Mike.
Ni sikiera Marisol Tromp cu awe diripiente a cuminsa critica maneho financiero hiba pa Gabinete Wever-Croes, tabata tin durf di para Mike su abuso cu placa di pueblo di Aruba. Hulanda a manda CFT investiga e desaster cu Mike a haci cu pueblo di Aruba y a saca afo cu Mike Eman a desgracia Aruba financieramente pa hopi aña nos dilanti.
Hulanda a duna Mike un KB y nos tur ta corda con Mike a bay den un welga di hamber falso cu a pone Aruba su cara na berguensa. Hulanda a baha duro riba Mike Eman y a obliga Mike y su parlamentarionan, incluso Marisol Tromp, pa pasa e ley di LAft pa controla y para e abuso di Mike Eman cu placa di pueblo.
Castigo na aña 2024: Awe cu nos ta corda con 10 aña pasa na 2014 Mike Eman a haya un KB pa abusa di cartera di pueblo, ata na aña 2024 Huez ta castiga Benny Sevinger pa abuso cu tereno di pueblo. Mike a laga Benny abusa di tur hende cu awe no tin tereno ainda pa traha nan cas. Mike a laga tur comerciante cu a pidi tereno comercial na caya, pasobra DIP mester a para tur trabao pa Ministerio Publico por a investiga Benny.
Huez a mustra con comerciantenan rond di Mike Eman y Benny Sevinger si a haya tereno. Huez a mustra tambe con Leoncita Arends cu a haci yen fanfaria traha protocol cu Mike Eman pa bon gobernacion, tambe a abusa cu tereno di pueblo haci negoshi na grandi. E castigo cu Leoncita a haya ta conta como castigo di pueblo pa Mike Eman tambe, pasobra ta Mike a permiti Leoncita abusa di tereno di pueblo.
Mike Eman ta abusa di Aruba: Segun Partidp MEP, esey ta djis dos ehempel con Mike Eman ta abusa di Aruba y pakico pueblo mester rechasa Mike su promesanan. Asina cu pueblo duna Mike poder, e ta bira abusa y castiga pueblo cu mal gobernacion.
