Parlamentario Marco Berlis reaccionando riba
ORANJESTAD (AAN): Parlamentario Marco Berlis di MEP, a splica cu el a tuma nota cu Mike Eman ta saliendo diariamente pa keda uza e mesun draaiboek tur dia. E draaiboek di strategia di sali ripiti gañamento, manipulacion y inventa chaos riba e tema di BBO na frontera, ta pa sembra odio y division den pueblo. E strategia catastrofico di mentira aki a costa Mike Eman dos Parlamentario y un candidato publicamente.
E bon ta, cu pa via di su strategianan di decepcion, e mes a hay’e ta worde exponi pa su propio candidatonan di su partido. Di e forma aki henter pueblo a haya sa e desastre cu ta cushina den e fundeshi y arkitectura di AVP; corupcion y mentira! Pesey caya ta papia cu mas candidato a bay pero den un forma silencioso.
Asina mes Mike Eman no tin berguensa di sigui troce informacion pa purba gana simpatia di pueblo. Mike cu orguyo a redobla nos debe nacional cu consecuencianan catastrofico pa nos pais y cu AVP hamas lo tin berguensa di sigui celebra corupcion.
Mike gañando cu BBO na frontera ta trece extra schakel: Ora bo ta desespera y bo ta usa politricks, bo ta recuri na mal informacion masal. Esey ta e strategia di Mike Eman. Lagami splica un biaha mas na pueblo con BBO na frontera ta funciona:
(1) Como negoshi, cu ta importa producto comercial (esta tur producto cu ta worde importa cu e meta pa worde rebendi), bo ta paga e BBO na frontera manera cu e producto drenta y e pago aki ta worde registra automaticamente den e sistema di DIMP.
(2) E comerciante ta paga 7% di BBO/BAVP/BAZV riba su volumen di benta di luna.
(3) Ora e comerciante haci declaracion di BBO na Departamento di Impuesto e siguiente luna e tin derecho riba deduccion di e suma di BBO na frontera riba tur e productonan importa cu proposito di benta y e diferencia di e suma e lo paga na final. Si dado caso e pago di BBO na frontera ta mas halto cu e BBO riba e volumen di benta, automaticamente e comerciante lo ricibi restitucion di e diferencia.
Ehempel: Compania “Sneakers Aruba” a importa keds.
Douanewaarde ta Afl. 2.000,-.
Sneakers Aruba a paga Afl. 140 (7% di 2.000) BBO na frontera.
Sneakers Aruba su benta pa augustus ta Afl. 3.000,- .
7% di Afl. 3.000 ta Afl. 210 na BBO/BAVP/BAZV.
Na september Sneakers Aruba ta entrega su declaracion di BBO y mester paga Afl. 70,- BBO na Departamento di Impuesto (Afl. 210 kitando Afl. 140). Den otro palabra, Sneakers Aruba ta paga e mesun suma di Afl. 210, pero awo na dos diferente momento: prome parti na frontera (Afl. 140) y e di dos parti ora di haci declaracion fin di luna na Departamento di Impuesto (Afl. 70).
Asina ta, na final di dia e comerciante nunca ta paga e BBO, riba e productonan importa cu proposito di benta, ta e cliente ta paga esaki na momento di benta.
Cu e ehempel aki pueblo por mira y compronde cu BBO na frontera y BBO ta funciona como un solo schakel y cu e BBO na frontera ta un pago adelanta y NO un impuesto. Solamente UN biaha e comerciante ta paga e 7% riba e productonan importa cu e proposito di benta y no dos biaha.
Mike ta gaña cu el a reduci BBO: Ainda Mike Eman tin e cuero di cara di bisa el a reduci BBO. el a haci esaki pa algun luna pa despues camufla y bulldoze e aumento di ley di BAZV na 2015 pa subi e BBO na 3.5%. Kiermen, Mike, di berdad bo ta gaba cu esaki? Bo no tin berguensa? Acaso bo ta kere e pueblo inteligente aki ta bay lubida bo mal hecho y mentiranan?
Pueblo por lesa y wak videonan di Douane, DIMP y Minister Xiomara Maduro splicando BBO na frontera ampliamente y di un forma simpel. Pueblo, busca semper informacion solido y confiabel, hamas di un fuente politico desespera y cu un partido corupto kibra.
