Parlamentario Marco Berlis (MEP):
Cas di Partido AVP muisstil cu luz y radio pag
ORANJESTAD (AAN): Na april 2023 tabata tin e sentencia di Corte di Prome Instancia den cual Mike Eman a invita prensa na Cas di Partido pa “celebra” cu Benny tabata djis un “tiki” culpabel so di corupcion den e caso Avestruz.
Mike den un rueda di prensa dilanti cas di partido hunto cu activistanan di AVP a grita, baila y canta hunto, mientras cu Benny Sevinger tabata crea storianan di fantasia con inocente e tabata.
Den un entrevista den prensa, Mike Eman a grita cu Benny no a coy ni un florin di niun hende y cu Benny no a haci nada malo. Ta pesey diabierna 12 di juli ultimo e veredicto di caso Avestruz a cay manera un bom atomico, cu a manda Mike Eman huy y sconde na su penthouse. Despues cu Mike Eman a brasa corupcion di Benny, y a sigura AVPistanan cu e mes a vota y lo sigui vota pa Benny, ata e bom a rementa den su cara. A keda constata cu Mike Eman a sostene corupcion y a nenga di saca Benny di Parlamento di Aruba!
Hues: Delitonan hopi grave ta conduci na un castigo mas halto: di 1 pa 4 aña di condena!
Benny Sevinger, cu anteriormente a sigura AVPistanan cu e ta inocente y cu hues den Corte di Prome Instancia a duna un “tien y pluimpje” pa su trabao, awo a hay’e sirbi cu un condena 4 biaha mas pisa cu esun prome. Asina Corte Comun a dicta sentencia den e caso Avestruz contra parlamentario Benny Sevinger, cu ta keda condena cu un castigo di prison di 48 luna di cual 12 ta condicional, cu un tempo di prueba di 3 aña. Ademas Benny Sevinger a perde e derecho di postula su mes como candidato den eleccion y e derecho di ocupa un funcion den sector publico durante un periodo de 5 aña. Segun Ministerio Pubico, Benny a haci su mes culpabel di soborno, defraudacion di Pais Aruba, abuso di su cargo y malversacion di fondonan. Benny Sevinger hunto cu co-sospechoso Leoncita Arends a estafa Pais Aruba, entre otro acusacionnan. Ademas e imagen di Pais Aruba a sufri dañonan grave a consecuencia di e accionnan di Benny Sevinger. Hues a declara cu loke Benny a haci ta hopi serio mes y cu e kier manda un señal cla pa tur politiconan cu e condena pisa aki.
Mike Eman perdi despues di e condena di Benny
E espectaculo mester sigui, pesey Mike Eman ta scondi actualmente den su penthouse y ta spera cu pueblo no lo tuma e condena di Corte Comun na serio. Mientras cu tur luz y airco di Cas di Partido ta paga, Mike mescos cu Benny ta tratando di convence AVPistanan cu ta Ministerio Publico, polis, recherche, y tur profesionalnan di e departamento hudicial ta hibando un “persecucion politico” contra Benny. Despues cu cuater hues a studia y condena Benny pa corupcion, ainda boso ta insisti cu ta un persecucion politico tin? Esaki ta e politiconan cu Aruba merece? Politiconan cu ta sostene y celebra corupcion den dia cla? Esaki ta e “Bon Comun” cu Mike Eman ta predica? Mike eman su mascarada a cay! Un cos ta sigur; “Mike Eman lo drenta historia como e unico lider cu a sostene y celebra corupcion aki na Aruba!” Pabien Mike!
