Marco Berlis (MEP):
ORANJESTAD (AAN): Mike Eman a sali na varios entrevista, rueda di prensa y den Parlamento ta bisa cu gobierno a haya 1.5 biyon Florin extra pero cu pueblo no por wak na unda e placa aki a bay. Ta pa e motibo ey tambe mi a confronte den sala di Parlamento pa expone su naturalesa mentiroso.
Segun Berlis, pe ta semper importante pa por presenta prueba y splica kico ta e berdad di cada ponencia falso di Mike Eman. Mike Eman, ta un homber desespera, cu un partido kibra, un consenshi den bancarota y cu votadornan den un dalende lijn. Kico cu e por haci of bisa awor pa por yega na poder atrobe, e ta bay pe.
E Realidad di e entrada di 1.5 biyon Florin “extra”: Mike Eman a bisa cu gobierno a ricibi den 6 aña 1.5 biyon Florin extra den caha y no por demostra unda esaki a bay. Mike Eman ta lubida algun cosnan importante cu e no kier pa pueblo corda mas. Pesey, laga nos repasa algun hecho cu a sucede durante su gobernacion cu aworaki ta splica e 1.5 biyon aki;
Mike Eman, a redobla nos debe y a redobla e interes di e debe. Cuanto e interes tabata prome cu Mike Eman a dicidi di masacra y redobla nos debe nacional? E interes cu pais Aruba mester a paga prome cu “Horcan Mike Eman” a drenta gobernacion tabata na 100 miyon Florin pa aña. Despues di Horcan Mike Eman, esaki a bira 250 miyon Florin. Esaki ta subiendo tur aña pa via cu su debenan ta madurando y mester refinancia esaki back y ta causando cu interes ta subi.
Mike Eman ta conoci pa “no traha cu rekensom” y ta pesey e no a preocupa pa redobla e debe y e interes di e debe. Mike Eman, reken pa mi, cuanto ta 6 aña bes 250 miyon Florin di interes cu cual ba masacra nos pueblo cu ne pa aña? At’e contesta aki: 1.5 Biyon Florin!
Kiermen ora Horcan Mike Eman grita pa instiga pueblo, puntr’e pakico el a redobla nos debe y interes di debe. Placa cu por a worde inverti den Aruba. Placa cu gobierno no tin, y awe e cuenta a yega pa paga. Placa cu Mike Eman a mara den debe y interes! Placa cual el a grita den Parlamento di Aruba; “Cu orguyo nos tur mester pag’e!” Awe nos mester pag’e. Awendia e ta yama nos gobierno uno criminal! Pero kende a redobla tur gasto? Kende ta e berdadero criminal?
Mike kier goberna sin rekensom y creando debe atrobe! Mike Eman ta experto pa pusha tur su mal maneho riba e gobierno actual. E ta bishita casnan cu e storia cu e ta bay redobla pensioen, subi bijstand, habri scolnan! Ken ta bay paga ora abo ta redobla pensioen Mike? Ken ta bay paga aumento di bijstand Mike? Ken? Paso ta di un caminda e placa tin cu bin! Promesa bashi cu Eman ta haci sin duna un bista di rekensom con e ta bay haci’e y ken ta bay pag’e.
Den conclusion, Mike Eman loke ba haci den 8 aña di gobernacion ta redobla debe, redobla interes y redobla e cuenta pa pueblo paga! Asina ba logra cu inversionan a yega un minimo, pasobra e debe y e interes ta na su maximo! Mike Eman ta un lider sin vision, hungando populismo, cu sentimiento di pueblo. Sinembargo candidatonan cu a sali di e partido corupto di AVP a sacodi e fundeshi exponiendo nan berdad; “AVP ta un partido corupto, sin compromiso cu integridad, un partido cu ta usa strategianan deceptivo, y cu no ta merece pa goberna e pais aki mas. Un partido cu ta celebra y brasa corupcion y tin cero credibilidad hamas por worde permiti goberna nos pais atrobe!” No ta MEP di, ta nan propio candidatonan di.
