Fraccion di AVP mustrando cu perseverancia a prevalece:
ORANJESTAD (AAN): Cu satisfaccion, Fraccion AVP a ricibi e noticia cu e obstaculo hudicial cu durante mas cu un aña a afecta e proceso di screening ministerial di nos colega, ing. Mike de Meza, a haya solucion.
E asunto tabata relaciona cu su situacion fiscal y un investigacion penal cu a surgi durante e proceso di screening pa su posibel nombramento como minister den Gabinete AVP-Futuro. Segun informacion presenta door di De Meza y su ekipo legal, a yega na un acuerdo cu Ministerio Publico pa regla e caso mediante un transaccion, sin admision di culpabilidad. Cu esaki, e impedimento penal cu tabata blokia su proceso ministerial a keda elimina y Mike de Meza ta ministeriabel atrobe.
Durante un periodo dificil y prolonga, Mike a sigui para firme, cu serenidad, perseverancia y confianza den e proceso. El a sigui cumpli cu su responsabilidad como parlamentario y sirbi comunidad, sin laga e circunstancianan kita su enfoke riba e trabao pa Aruba.
Mike ta un politico cu experiencia, capacidad y un profundo amor pa nos pais. Su compromiso cu bienestar di henter Aruba y su districto semper tabata evidente den su trayectoria politico.
Fraccion AVP ta reconoce tambe e dedicacion y profesionalismo di su ekipo legal y di tur esnan cu a sostene Mike durante e proceso aki.
“Mikey, nos ta orguyoso di bo perseverancia, bo serenidad y e manera cu bo a sigui para firme. Nos a sigui kere den bo y nos ta kere den bo capacidad pa sigui aporta na bienestar di Aruba.”
Fraccion AVP ta felicita ing. Mike de Meza y su team pa e paso importante aki. Hunto nos ta sigui traha, cu experiencia, compromiso y determinacion, pa un Aruba mas fuerte.
