Segun Parlamentario Berlis:
ORANJESTAD (AAN) – Como e di dos tema, den conferencia di prensa di su fraccion, Parlamentario Marco Berlis tambe a reacciona tocante e carta publica pa Parlamentario Miguel Mansur, di Accion 21, tocante e ley cu e kier pa wordo aproba pa permiti matrimonio entre mesun sexo, aki na Aruba.
Berlis a referi na unda Mansur a bisa: “sectanan Cristian cu atake riba nos democracia”. Segun Berlis, el a analiza loke Mansur a señala, y e por nota cu e tin un problema hopi grandi pa interpreta e leynan di nos Constitucion of no ta compronde su contenido.
Mansur ta bisa cu e sectanan Cristian a menaza miembronan di Parlamento. Berlis a trece dilanti cu el a scucha tur e conferencianan di prensa contra e ley, y cu specificamente un Pastor a expresa pa Cristiannan tuma nota cu e fraccionnan cu ta para tras y ta firma y boga pa e ley aki wordo aproba, y pa no vota pa nan pero vota conciente pa esnan cu ta contra e ley. Berlis no ta mira cu esaki ta un menaza, pero menaza ta ora cu su persona hunto cu su colega Tevreden a para contra e ley aki, y nan bida y nan famia a wordo menaza di wordo destrui.
Berlis a splica parlamentario Mansur cu e lidernan Cristian a para pa nan derecho di liber expresion cu ta ancra den Aruba su Constitucion. No tabata tin ningun palabra malo ni ningun menaza personal, contra ningun hende, sino nan a djis vocifera pa locual ta e votacion den futuro pa esnan cu ta seguidornan Cristian.
El a agrega cu Mansur kier desinforma pueblo, mirando cu parti di su miembronan di LGBTQ si a menaza otro pastor di denominacion protestant, contra su bida y su famia. Berlis ta lamenta cu Mansur kier demonisa e lidernan Cristian cu ta djis haci uso di nan derecho constitucional y tambe ta para pa loke nan ta kere den dje.
El a agrega cu Mansur a papia un barbaridad ora cu e ta bisa cu Iglesianan a organiza un atentado contra democracia, pero e no por tume na serio pasobra e ta bastante ignorante con ta interpreta e leynan of e no ta compronde kico e Constitucion ta contene, cu ta e derechonan cu cada ciudadano tin.
