Parlamentario Dangui Oduber:
ORANJESTAD (AAN): Parlamentario Dangui Oduber a indica cu loke nan por a nota durante e prome 100 dianan di gobernacion di e gobierno 'AVP sin Futuro' ta un gobierno caotico, un gobierno sin liderazgo, sin vision y mas bien un gobierno cu a bin pa derocha placa di pueblo.
E gobierno aki despues di 100 dia no a haci nada, nada y nada y no a cumpli cu ningun di nan promesanan haci. Nos pueblo a wordo priminti cu e gobierno aki lo bay mehora poder di compra, nan a bisa cu tur prijs nan Aruba lo baha y frigidiarenan na Aruba lo ta yen atrobe.
Esaki ta e expectativa cu tanto Partido AVP como Partido Futuro a crea. E realidad awe ta totalmente contrario y e realidad amargo ta cu den apenas 100 dia di gobernacion nos pais a bay atras. E situacion pa famianan NO a bira miho, e poder di compra NO a ser mehora y Aruba a bira mas caro aun. Mientras minister di inflacion Wever ta bisa cu 99% di prijsnan na Aruba NO a subi, tur consumidor ta pensa contrario. Segun mi, minister Wever ta desconecta cu e realidad y ta biba ‘in denial’ of e mester bisa pueblo unda e ta haci compras pa pueblo tambe haci compras eynan.
Nos ta nota con nombracionan politico ta tumando lugar sin vacatura, sin open sollicitatie y cu salarionan cu un averahe di Afl. 15.000 pa luna. Ta nombra un diplomatico cultural sin tene un open sollicitatie procedure pa AVP y despues Partido Futuro no ta keda atras y ta nombra un candidato cu a haya mas di 100 vergunning di transporte, ta wordo nombra como District Advisor. Un funcion cu NO ta existi, un funcion cu a wordo crea pa paga un candidato di Futuro 15.000 heldu pa luna. Minister Gerlien Croes a bisa cu nan lo percura pa publica tur vacatura, cu lo tin open sollicitatie y awe nos ta wak con e tambe a gaña tur hende y tuma tur hende haci!!
E situacion na Aruba ta uno preocupante. 83% di nos poblacion ta di opinion cu nan placa no ta rindi y nan no por cumpra mes hopi cos cu nan tawata por a cumpra fin di aña pasa. Esaki ta bisabo cu poder di compra a bay atras, cos a bira pio y placa no ta yega! Pa e siguiente 6 lunanan e consumidor ta hopi negativo y preocupa cu e aumento di prijsnan explosivo cu tin. Mientrastanto ainda minister Wever NO tin un plan di accion concreto con lo mehora poder di compra y con lo yena firgidairenan bek na Aruba.
Despues cu e mes a castiga pueblo cu un aumento di gas di 35% pa un compania cu a haci mas di 13 miyon florin di ganashi nos a spera un plan y un vision cual ainda lamenteblemente NO tin!
