ORANJESTAD(AAN)—Na 2017 Aruba a enfrenta eleccion na un forma special. Aruba su caha tabata bashi y Hulanda tabata scrap e cifranan cu a wordo prepara
dor di Gobierno Mike Eman, mientras cu den e lachi di Benny Sevinger ainda e rapport di 1.6 Miljard di Bo Aruba tabata scondi.
Te na ultimo momento prome cu eleccion 2017, gobierno anterior tabata invita Aruba pa bay baila na e Brug nobo na Balashi, mientras ya solo a baha pa e Aruba cu na 2009 Pueblo a entrega na Mike Eman.
Awe Aruba ta enfrenta un eleccion nobo. Un eleccion completamente diferente for di e ultimo oportunidad cu Pueblo a acudi na urna electoral.
Di 2017 pa awe, Aruba a biba uno di su temponan mas dificil den un siglo.
Placa a caba prome cu 2017 y loke Aruba a ricibi pa drenta futuro tabata debe y mas debe pa e pais paga.
No tabata debe cu a wordo haci pa un pais por tabata tin mas industria. Tabata debe basa riba haci politica na un forma, manera nunca prome Aruba a conoce.
E experencia cu gobierno Mike Eman a laga pa Pueblo, awe ta haci cu Pueblo ta mas exigente cu nunca cu mundo politico.
E demanda grandi pa Evelyn Wever-Croes tabata pa percura pa Pueblo por a sigui come mientras caha di Gobierno tabata bashi y economia ya tabata un desastre.
Pasobra no ta solamente placa no tabata tin pasobra gobierno Mike Eman a gasta placa di Pueblo na un forma cu hamas hende lo por a pensa, pero e economia cu el a priminti pueblo tambe tabata fantasia.
Na 2017 Mike Eman a entrega Aruba un base economico, cu tabata basa riba Citgo, cu tabata e fantasia mas grandi cu politica na Aruba por a produci y cu na momento di eleccion a wordo bari for di mesa dor di situacion internacional den cual Venezuela a bira un pais di hamber y no un pais pa soluciona hamber di Aruba, manera Mike Eman kier a laga pueblo kere.
Pan riba mesa, tabata e exigencia cu Pueblo a entrega na Evelyn Wever-Croes cu a cuminsa traha riba un futuro nobo pa Aruba sin por a mira dilanti cu Covid-19 lo a lansa un atake frontal riba salud di e Arubiano.
Sin placa, den un situacion financiero desastroso, Evelyn Wever-Croes a actua y a scapa bida di Arubianonan, cerando porta pa economia.
Cu plannan di emergencia el a percura pa Aruba por a duna asistencia financiero na su ciudadanonan cu a keda sin trabou, pero si a keda cu pan riba nan mesa.
Na mes momento a amplia e base di cuido medico, a introduci e app cu a yuda Arubianonan lanta para contra Covid-19.
Ni Hulanda tabata conoce e app, cu Gobierno Wever-Croes a introduci pa Aruba cu a bira un ehempel pa Reino den e forma cu el a contesta e atake pisa di Covid-19.
Evelyn Wever-Croes a dirigi un gobernacion historico cu mester a percura pa salud y pan di e ciudadano. E dos ingredientenan mas importante pa e ser humano sobrevivi.
Con Aruba lo sigui? Un bon gobernacion ta percura pa un bon futuro pa un Pueblo. Un futuro den cual proyectonan cu Evelyn Wever-Croes a atrae den pleno pandemia, mester ofrece trabou na Pueblo mientras turismo mester recupera.
E forma cu Aruba a vacuna contra Covid-19, e tremendo trabou cu un instancia internacional manera International Monetary Fund a aplaudi, awe ta motibo pa Aruba tin speransa.
Aruba ta evalua e trabou di Evelyn Wever-Croes na inicio di un epoca nobo di recuperacion no solamente di un enfermedad causa pa un virus pero di un experencia politico hereda na 2017, cu nunca mas mester haya ripiticion.
