Mensahe di MEP despues di resultado
ORANJESTAD (AAN): Riba Diasabra marduga mes, lider Evelyn Wever-Croes di Partido MEP a emiti un declaracion, despues cu su partido a logra 17.572 voto, cu a pone sali na di 2ndo lugar di popularidad den eleccion 2024 teni Diabierna 6 di December 2024.
El a bisa cu den nomber di MEP e ta gradici e mas di 17 mil votadornan, pa kere den nan den bon tempo y den mal tempo.
El a sigui bisa: “Despues di dos gobernacion, tin desgaste. Nos talves no por a complace tur hende. Ademas nos a hiba un campaña den cual tur otro partido tabata contra nos. Pa mundo henter nos recuperacion tabata impresionante pero pa e ciudadano di Aruba mes, manera ta mustra, e no tabata suficiente.”
“Mi a felicita e lidernan di e partidonan Futuro y PPA caba, cu e resultado di eleccion y mi ta desea nan hopi exito. Cu e resultado manera e ta aworaki, nos no ta e prome yama pa forma e siguiente gobierno.”
Wever-Croes a sigui bisa: “Ami tin mi consenshi limpi pasobra mi sa cu mi ami y coleganan a traha extremadamente duro den gobierno. Mi ta hopi orguyoso di nos logronan. Y mas cu tur cos: mi sa cu mi ta laga Aruba hopi mas mihor cu mi a haye na aña 2017.”
Despues di 7 aña di gobernacion, y despues di 2 gobierno di coalicion, MEP a mantene su forza como e partido mas grandi den 4 di e 6 districtonan di Aruba: Noord, Paradera, Santa Cruz y Savaneta. Y nan a mantene 8 asiento, perdiendo solamente 1 asiento. Esaki so caba ta un logro historico. Danki na e 17.572 personanan cu a deposita nan confiansa den partido Movimiento Electoral di Pueblo.
El a finaliza bisando: “Si e deseo di pueblo ta cu nos mester cuida e interes di pueblo for di oposicion, MEP lo t’ey pa defende e pueblo cu talves e ora ey lo comprende e compromiso di MEP cu su pueblo.”
