Parlamentario Evelyn Wever-Croes:
* Bay bek na mesa pa negocia un miho acuerdo cu Hulanda
ORANJESTAD (AAN): Awo cu consehonan oficial di tanto Raad van Advies di Aruba y Raad van State di Hulanda a constata cu ley di Reino HOFA ta limita nos autonomia y nos constitucion, ta tempo pa sigui y haya miho acuerdo pa Aruba. Partido y Fraccion di MEP ta propone y urgi Gobierno di Aruba pa uza e consehonan aki como aliado.
“Bay mesa bek y sigui negocia y splica Hulanda cu no ta husto pa Aruba paga e prijs halto di entrega di nos autonomia pa simplemente un reduccion di interes. Convence Hulanda cu e interes mester keda determina a base si Aruba ta bon pagado of no”, asina Parlamentario Evelyn Wever-Croes a duna di conoce.
E parlamentario di Fraccion di MEP a enfatisa cu Aruba semper tawata y ta un bon pagado. Situacion financiero di Aruba ta miho para cu otro paisnan den Reino den Caribe. Esaki ta motibo fuerte pa Gobierno di Aruba bay bek negocia pa yega na un miho acuerdo cu Hulanda pa baha e interes.
“Si Hulanda no ta dispuesto, busca otro caminda cu si ta dispuesto pero no bay asina leu di entrega e autonomia di nos pais cu ta loke a duna nos tur e bienestar y tur e progreso cu awe nos ta goza di dje”, Parlamentario Wever-Croes a enfatisa.
Usando palabranan cu nos organonan halto di estado ta bisa, Parlamentario Wever-Croes a bisa cu: “Bo no por duna algo cu no ta di bo pa duna. Bo no por aworaki, door di bay di acuerdo cu e ley aki, prohibi Parlamento aki 20 aña pa tuma decisionnan riba su mes. Bo no por tuma decisionnan awe cu ta kita autoridad di un gobierno pa tuma decisionnan na bienestar di nos pais aki 20 aña”.
E Parlamento a enfatisa, cu na momento cu Gobierno AVP Futuro bay di acuerdo cu e ley aki, e ta pone Aruba bou curatela y e ta pone tur gobierno y parlamento di futuro bou di e curatela aki. Y, el a expresa, Gobierno aki no por haci esaki, pasobra e no tin autoridad pa hacie.
“Nos ta spera cu aworaki, Gobierno uza e consehonan aki den nan fabor, uza nan como nan aliado y percura pa baha e condicionnan irasonabel di Hulanda for di mesa, pa asina for once and for all, nos por pone un punto final tras di henter e discusion aki”, Parlamentario Wever-Croes a enfatisa.
