Parlamentario Clifford Heyliger:
ORANJESTAD (AAN): Durante e sesion publico di Parlamento di Aruba, Parlamentario Clifford Heyliger di partido AVP a presenta su disertacion tocante e proceso di e Rijkswet Houdbare Overheidsfinanciën Aruba (HOFA), den cual e a destaca e importancia di transparencia, claridad y madurez den splicacion di un tema cu segun dje, ta compleho pa hopi hende.
Heyliger a expresa cu su meta den e reunion aki tabata pa splica e proceso di manera simpel y comprendibel pa pueblo, pa cu tur hende por sigui e desaroyo cu ta tuma lugar. “Tin hopi cos ta worde bisa publicamente y tras di porta cera. Mi ta kere cu e pueblo merece compronde kico realmente ta pasa,” el a bisa.
Den su discurso, e parlamentario a compara e situacion actual cu un bolo yena cu veneno cu e gobierno anterior, MEP/Raiz, a prepara y pone den forno. “E gobierno actual a haya e bolo den forno y a tuma e responsabilidad pa wak cu e bolo no kima. Pero awor e mesun hende cu a pone e veneno den e bolo kier pa gobierno sac’e afo y cuminsa di nobo. Esaki no ta realista,” Heyliger a bisa den tono critico.
Heyliger a duna un resumen di e trayecto cu Aruba a pasa durante y despues di e pandemia. El a recorda cu prome a bini cu e propuesta di CHE, cu tabata un plan hopi dañino pa autonomia di Aruba. Despues, e gobierno anterior a bin cu COHO, cu tampoco a logra e resultado spera. Finalmente, den januari di 2023, COHO a cay y a bin cu un onderlinge regeling, cu despues a yega na un acuerdo di refinanciamento di debe den october 2023.
E parlamentario a enfatisa cu riba 4 di juni 2024, e gobierno anterior a firma e Bestuurlijk Akkoord, pero solamente despues a realisa cu nan a “bende autonomia pa un saco di placa.” Heyliger a bisa cu despues di esey, e gobierno anterior a inventa un “sistema hybrid,” cu segun nan, tabata un solucion innovador, pero cu na fondo no tabata nada mas cu un combinacion di un LWHO (Landsverordening Waarborging Houdbare Overheidsfinancien y un Rijkswet HOFA.
Heyliger a conclui su disertacion cu un mensahe di reflexion: “E oposicion a uza strategia, pero no sabiduria. Strategia sin sabiduria ta keda bobedad. E biblia ta bisa: ‘For the Lord gives wisdom; from His mouth come knowledge and understanding.’ Nos mester traha cu sabiduria pa saca Aruba for di e situacion actual di division y confusion.”
MEP a pone su propio strategia politico door di crea un bolo venena pa mina e maneho di e proximo gobernacion y pa mas laat nan mes por a bin dilanti y profila como defensor di autonomia. Sin embargo, pueblo por wak door di esey y loke Aruba tin mester di dje awo ta pa oposicion obra cu sabiduria den parlamento pa hunto nos por brinda nos pais e miho futuro posibel.
