E retonan di nos pais mester di accion cu determinacion
ORANJESTAD (AAN): Prome Minister Mike Eman tabata na Hulanda pa un biahe di dos siman. Durante e dos simannan el’a haci algun bishita, pero ningun cu bo por bisa ta di tal peso cu e mester a keda asina largo den exterior. El’a biaha cu un delegacion grandi, cu ta haci e gastonan enormemente halto.
Tabata mas bien un biahe pa e mehora su imagen na Hulanda, cu a keda cu daño inmenso despues di su welga di hamber 11 aña pasa, y cu ainda na politiek Den Haag ta papia di dj’e. E prome reaccionnan no ta mustra positivo. Comentarionan manera ‘Esaki no ta e Mike Eman cu nos tabata conoce, e falta vision y pasion’, como tambe ‘Di con e ta roga tanto asina, ta manera ta fabornan e ta bin pidi’. Si el’a logra drecha su imagen durante e biahe costoso aki, tempo lo mustra.
Locual si a cay den masha mal tera, ta cu den su afan pa hisa su popularidad, el’a rebaha Aruba den un programa na television hulandes. El’a papia masha malo mes di Aruba, cu tin pobreza y sushi tur caminda, y pa completa obra, a tira culpa riba turismo.
Aruba tin su retonan, berdad, pero mester di vision y determinacion pa soluciona nan aki na cas, no yoramento y papia malo na television di otro pais. Candidatonan di partido MEP ta constantemente den barionan pa busca firma contra e ley di reino HOFA, y a topa cu varios persona hopi disgusta cu e prome minister, pa e motibo aki. Enbes di goberna nos pais, y soluciona e retonan, nos ta mira un gobierno cu no ta haciendo net net nada den gobernacion, nan ta pleita so cu otro, desconfianza ta bisto tur caminda, kita cartera di otro, y riba dje, e prome minister ta scohe pa bay yora y keha na television hulandes.
Un berguensa total! Tur esaki tin un impacto negativo riba e imagen di Aruba na Hulanda, y ta nos Arubianonan biba aya lo sinti e consecuencia.
