Di con ta companianan Hulandes so ta haya tur cos
ORANJESTAD (AAN): Un desaroyo alarmante cu a hala atencion di hopi hende ta e hecho cu tur proyecto grandi ultimo tempo, ta bay den man di hulandesnan. Hasta tin hende ta haci e pregunta: Geoffrey Wever ta minister di economia di Aruba of di Hulanda? Pasobra ta parce cu ta progreso pa companianan hulandes so e ta busca, mientras companianan local no ta haya oportunidad, mientras varios ta luchando pa sobrevivi.
Cunukeronan perhudica: Cunukeronan di Aruba ya caba a bati bel di alarma pasobra nan ta worde perhudica caba cu e desaroyo aki.
Na nan opinion, Minister Geoffrey Wever, enbes di duna cunukeronan tereno, a dicidi di pasa tur tereno pa e compania hulandes, haciendo plantamento hopi mas caro. Y aki poco tempo, ningun por sigui planta, pasobra hulandesnan ta tuma over.
Competencia inhusto: Locual mas bien ta pasando, ta e competencia inhusto cu tin cu localnan no por competi cu hulandesnan.
Ta permiti companianan grandi establece nan mes na Aruba, cu ta competencia directo pa tiendanan grandi manera “Do It Center” y “Price Mart”. E pregunta ta: cu ki intencion?
Sin Rijkswet: Esaki ta awor caba, SIN rijkswet. Djis imaginabo cuanto poder mas lo bay pa e hulandesnan unabes e rijkswet, e ley di reino HOFA, drenta na vigor.
Pasobra e ley di reino aki ta algo cu partido Futuro ta pusha p’e. Partido AVP mes semper tabata contra e ley. Awor ta bira obvio di con partido Futuro kier e Ley aki: pa caba di entrega tur cos na hulandesnan. P’esey pueblo di Aruba mester ta alerta.
