ORANJESTAD (AAN) – Den conferencia di prensa di fraccion di MEP, Parlamentario Endy Croes a cuestiona Marisol Lopez-Tromp,
pa un declaracion cu el a haci den un matutino, y cu segun e parlamentario ainda Marisol ta hunga di victima.
Den e declaracion cu Croes ta cuestiona, Lopez- Tromp ta bisa cu, envez cu e ministernan y envez cu parlamento y tambe Prome Minister a sostene ora cu el a detecta corupcion, nan a lague cay y a core cune.
“Ora cu mi a lesa e articulo ey, mi kier a bin bek na loke a sosode aña pasa. Mi no ta bay dedica mucho tempo na esaki, pero algo cu mi kier trece dilanti ta, su bo a detecta corupcion, bo a entrega un keho? E contesta ta NO. Ami, por ehemplo, ora el a papia di spirito a puntre y ora cu el a bisa, na dos ocasion, cu tin empleadonan cu ta gana mas cu director. Mi a bise pa trece prueba, bisa mi cual empleado, pasobra ami tampoco mi lo no aproba esaki. Te awe, nos ta warda e contesta. Loke mi kier bisa, tras di e show pa hunga victima, pa hunga manera Mascaruba den e caso aki, ta bon pa prensa puntra señora Marisol Lopez-Tromp, cu a cuminza caba cu un yoradera den un matutino. Mi no ta kere cu esey lo yuda, den porta di eleccion pa bo bay purba gana simpatia, pasobra bo ta e victima pasobra por ta nan a core cu bo, etc. etc. Caminda cu a destitui Marisol a cana e caminda corecto, di acuerdo cu nos Constitucion, cu un Decreto firma pa Gobernador. Mi ta laga esaki te akinan, pa mi no mester bay mas profundo riba e tema aki, pero tampoco nos mester duna mentira bida. Bo a constata algo? Duna keho manera fraccion di MEP si a haci den caso avestruz, den caso di Mike Eman cu e 50 mil dollar cu el a ricibi, den e caso di rapport Bo Aruba, cu tambe nos a entrega keho, anto bo ta para den bo zapato. Ora bo ta papia algo para pe, pero no tira den bashi”, Endy Croes a trece dilanti.
