Lider di fraccion MAS Marisol Tromp:
ORANJESTAD (AAN): Durante e bishita di cortesia di secretario di estado di Asuntonan di Reino y Digitalisacion Zsolt Szabo el a cera conoci cu algun parlamentario y a pone enfasis riba e importancia di tin resultadonan den termino largo pa loke ta trata bon gobernacion, un finansa publico solido y un economia duradero.
Den cuadro di esaki, Fraccion MAS a haci un peticion na Gobierno pa duna un relato mensual detaya por escrito na Parlamento encuanto e proceso cual Hulanda y Aruba ta encamina pa finalisa e Rijkswet, cual lo mester bin na vigor otro aña. E motibo pa e peticion aki ta basa riba e preocupacion cu MAS tin riba e maneho financiero di Minister Xiomara Maduro.
Ta asina cu prome cu ex-Secretario di estado Van Huffelen a baha, el a informa Tweede Kamer di Hulanda, basa riba un investigacion recientemente haci cual ta e asina yama ‘Beleidsevaluatie Protocollen Aruba-Nederland’. Den e investigacion aki a laga investiga con leu Xiomara Maduro a cumpli cu e palabracionnan haci na 2015, 2018 y 2022. E resultadonan cual a bin dilanti den e rapport no tabata nada di gaba! Palabranan usa tabata: ‘doelstelling van verbeterd financieel beheer is niet gerealiseerd’, ‘financieel beheer van Aruba blijft zwak’, ‘Aruba loopt achter met de jaarrekeningen’, ‘informatie daarin is onvoldoende betrouwbaar’ y ‘uitvoerings- en verantwoordingsinformatie komt vaak te laat’. Pues despues di tanto esfuerso haci, toch e maneho financiero di Xiomara Maduro a keda zwak.
Tambe su entrega di rapportnan financiero pa duna cuenta cada kwartaal (uitvoeringsrapportage) na CAft ta hopi biaha laat. Y no ni papia mes riba e cuentanan anual di Pais Aruba di 2019 y bay ariba, cual tambe ta hopi laat y pues no a yega Parlamento ainda! Conforme ley di contabilidad, e rapportnan aki (jaarrekeningen) ta importante pa Parlamento por haci su debido control riba e gastonan haci contra loke a wordo presupuesta pa cada minister den cada aña. Cu otro palabra, asina nos por wak di berdad na unda placa di pueblo ta bay!
