Parlamentario John Hart di AVP:
ORANJESTAD (AAN): Parlamentario John Hart di fraccion AVP ta informa cu optimismo riba un desaroyo positivo den e area di maneho laboral na Aruba, despues cu minister encarga cu Labor, mr. Wendrick Cicilia, a contesta satisfactoriamente un total di 18 pregunta parlamentario dirigi na su persona algun tempo pasa.
Segun Hart, aunke tur pregunta tabata importante, ta necesario pa remarca cu parti grandi di nan tabata enfoca riba “toezicht y handhaving” (supervision y cumplimento) di nos leynan laboral.
“Supervision y cumplimento di nos leynan laboral ta crucial pa un mercado laboral husto. Esaki ta percura cu doñonan di trabou ta cumpli cu e leynan existente y ta fungi como proteccion pa empleadonan. Reenforsa cumplimento di nos leynan laboral ta esencial pa e integridad di nos economia. Ta importante pa ekipa e departamento di inspeccion cu sosten huridico pa garantisa cu por actua, pa impone multa y sanciona incumplimento di leynan laboral” Hart ta enfatisa.
E contestanan di minister ta refleha un compromiso firme pa implementa, amplia y fortalece e marco legal laboral, cu meta pa proteha y salvaguardia e derechonan di tur trahador na nos isla.
Minister Cicilia a indica cu e implementacion di e rapport “Modernisering Arbeidsinspectie – Op weg naar een betere handhaving van arbeidswetten” ta un prioridad. Un di su puntonan principal ta intensifica e trabou di toezicht y control di Departamento di Labor. Parlamentario Hart tambe a expresa su satisfaccion cu, despues di hopi aña, a ricibi palabra di e inspectornan mes cu por fin nan a haya un audiencia cu e minister encarga. Durante e reunion, minister a entrega oficialmente e rapport menciona cu 25 recomendacion pa modernisa y fortalece inspeccion laboral, cu hopi di nan ta dirigi mes riba e preocupacionnan cu Hart a trece dilanti anteriormente. Hart ta elogia e reconocemento y respet cu minister ta mustra pa e profesionalnan di inspeccion.
Minister tambe a confirma un compromiso pa agrega sosten huridico na e inspeccion laboral pa garantisa cu den futuro e departamento por impone multa y aplica sancionnan den caso di incumplimento di e ley laboral.
Na fin, Parlamentario John Hart reafirma cu lo sigui vigila di cerca tur desaroyo y cambio den nos leynan laboral y cu su prioridad for di Parlamento di Aruba ta pa fortalece e husticia laboral na Aruba. Den presupuesto 2026 lo dedica atencion pa e parti specifico di supervision y cumplimento di nos leynan laboral.
