ORANJESTAD (AAN): Partido AVP ta di opinion, cu na Aruba nos Mamanan cu ta biba diariamente cu e preocupacion di falta di placa,
cu prijsnan aumentando drasticamente y un acumulacion di debe ta esnan cu mas ta sufri di e pobreza creciente na Aruba. Nos mamanan ta worde confronta diariamente cu e placa no ta yega y e dolor cu na cas no por provee pa e famia cu e alimentacion necesario. Un situacion sumamente doloroso cu ta conduci na preocupacion y un stress cu efectonan hopi negativo pa salud físico y mental.
Tur esaki tambe cu presion grandi riba e nucleo familiar y cu hopi vez ta conduci na fragementacion di hogar y hobennan desorienta.
Diadomingo a celebra Dia di Mama, y segun AVP, tur dia nan ta papia cu y scucha di nos mamanan con dificil nan tine. Nan ta mira nan clamor back tambe den e cifranan di Centraal Bureau Statistieken y Banco Central. Tur ta confirma locual nos ta mira y tende di nos mamanan: aumento dramatico di costo di bida, miles di famia den crisis financiero y poder di compra severamente afecta. Nos mamanan empleado, profesional, empresario y nos mamanan grandi bibando unicamente di un pensioen, tur ta sufriendo.
E Gobierno actual di MEP/RAIZ no ta parce di ta realisa kico y con nos mamanan y na famianan ta sufriendo. Aruba ta bay di un medida pa otro mientras gobierno di Evelyne Wever Croes den pleno cara di un pueblo den dolor ta keda aumenta su gastonan di luho y ta keda favorece amigonan y familiar.
Fraccion di AVP a entrega un Presupuesto Alternativa pa trece alivio pa miles di famia na Aruba, pa cambia e rumbo di un maneho di malgastamento di recursonan y pone prioridadnan corecto. A pone prioridadnan den e Presupuesto Alternativa pa salbaguardia acceso na enseñanza liber, acceso na cuido medico, yuda famianan cu muchanan cu un limitacion, soluciona problema di werkster y retorna e 12.6%. Fraccion di AVP a substancia e cambio di rumbo aki pa trece perspectiva positivo cu cifra den su Presupuesto Alternativa, pero MEP/RAIZ kier continua riba e rumbo di medida.
E pobreza creciente aki cu tur su diferente efectonan ta causa tambe un spiral negativo. Un spiral negativo cu ta bira dificil pa sali afor, pasobra e ta den tur faceta di bida di nos hogarnan; pobreza, problema social, malestar fysico y psychologico, fragmentacion di famia y instabilidad y intraquilidad, muchanan y hobennan ta bira victima y henter comunidad ta perde su felicidad, perspectiva pa futuro y trankilidad.
Segun AVP, e rapportnan di mercado laboral ta mustra con e participacion di hende muher a cay den pandemia te na 50% y raportanan internacional tambe ta keda mustra con e ama di cas, e hende muher ta esun cu mas ta sufri bao di e crisisnan social economico: “The pandemic has exacerbated existing inequalities: women have been most adversely affected by the economic shock and are at higher risk of falling into extreme poverty than men. This is a result of job losses, as the sectors in which women are predominantly employed were the hardest hit – resulting in a loss of at least $800bn in income for women globally in 2020 – and an increase in their unpaid care workload”.
Den un reflexion cu amor pa nos mamanan mester tin un compromiso nobo pa yega na cambia rumbo di nos Pais pa un y tur, pero sigur pa nos mamanan cu mas ta sufriendo. AVP a bisa di lo bay keda haci nan maximo pa por trece e cambio cu nan merece, y pa ofrece nos mamanan e bida digno, husto, cu stabilidad y felicidad cu nan merece como e pilar di nos hogarnan.
