Ursell Arends den entrevista cu DIARIO:
ORANJESTAD (AAN) — DIARIO a haya bishita di señor Ursell Arends, lider politico di Partido RAIZ, ken a bin expresa kico ta su vision pa e proximo eleccion Parlamentario, particularmente riba transporte publico.
El a cuminsa elaborando riba e proyectonan cu e no a logra termina na momento cu gobierno a cay. Esakinan ta dos proyecto: uno ta e concepto di ley pa introduci derecho di naturaleza den Constitucion, y e segundo ta e Plan di Revitalisacion di San Nicolas, cu lo inclui un proyecto di un mercado popular (Farmers Market), y tambe un mehoracion di e Parada di Arubus di San Nicolas, cu ta bay yama Central San Nicolas.
E terminal di San Nicolas tambe ta den mal condicion y San Nicolas mester di Arubus mescos cu Arubus mester di San Nicolas.
“E ta bay haya un fachada completamente nobo, panel solar riba dak pa contribui na conexion y fluho di pasahero pa San Nicolas, contribui na e transicion di energia sostenibel pa nos pais”, Arends a menciona.
Tocante e flotanan di Arubus, el a indica cu e inversion haci anteriormente no a resulta y aworaki mester inverti den busnan nobo, pero cu tambe ta traha cu coriente. “Y cu ta capacita pa adulto mayor y hendenan cu limitacion fisico. Inversionnan ta bay wordo haci pa e parada di busnan tambe, y e fondonan ta aloca caba. Esakinan ta pa inverti den un total di dies pa 15 abri, pero en realidad mester di hopi mas”, Arends a declara.
Den e terminal di Arubus na Playa, tambe mester bin inversionnan p’asina aki sirbi interes di tur e usuarionan di Arubus, mirando cu e compania ta saliendo di su 33 miyon debe cu gobierno a hereda. “Por fin tin luz na horizonte cu inversionnan por tuma lugar na beneficio di tur usuario”, Ursell Arends a duna di conoce.
E intencion ta pa den e proximo gabinete introduci e carchi activo di Arubus. “E carchi activo ta pa duna acceso na tur hoben y adulto mayor, no solamente acceso na transporte publico, pero tambe na programanan di arte, cultura, creatividad, musica y deporte. E meta ta pa subsidia e carchi activo aki, p’asina empodera nos hobennan y adultonan mayor. Esey tambe ta yuda nos stimula e uzo di transporte publico”, e lider di RAIZ a indica.
